ތިލަމާލެ ބްރިޖުގެ މަޝްރޫއަކީ އިންޑިއާގެ އެގްޒިމް ބޭންކުގެ ލޯނަކުން ހިންގާ މަޝްރޫއެކެވެ. އެ މަސައްކަތް ކުރިއަށް ގެންދަނީ އިންޑިއާގެ އެފްކޮންސް ކުންފުނިންނެވެ. ޝެޑިއުލަށް ބަލާއިރު މާލެ އިން ފެށިގެން ގުޅިފަޅާ ހަމައަށް ބްރިޖު ގުޅާލުމުގެ މަސައްކަތް މާޗު 2026ގެ ނިޔަލަށް ނިންމާނެ އެވެ. ކުރީ ސަރުކާރުގައި އެ މަސައްކަތް ކުރިއަށް ދިޔައީ ތާވަލަށް ވުުރެ ލަސްކޮށެވެ.
ތިލަމާލެ ބްރިޖުގެ މަސައްކަތް ކުރިއަށްދާ ބައްލަވާލެއްވުމަށް މިހާރު ރާއްޖޭގައި ހުންނެވި، އިންޑިއާގެ މިނިސްޓަރ އޮފް އެކްސްޓަރނަލް އެފެއާޒް ޑރ. ސުބްރަމާނިއަމް ޖަޔަޝަންކަރުގެ ކުރެއްވި ޒިޔާރަތުގައި އެމަނިކުފާނު އަރިހުގައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބާއި ފޮރިން މިނިސްޓަރު މޫސާ ޒަމީރު ވެސް ބައިވެރިވެވަޑައިގެންނެވިއެވެ.
މި ޒިޔާރަތުގައި ޑރ. ޖައިޝަންކަރު ވަނީ ބްރިޖްގެ މަސައްކަތް ކުރިއަށްގެންދާ އެފްކޮންސް ކުންފުނީގެ މުވައްޒަފުންނާއި ބައްދަލު ކުރައްވާ ބްރިޖްގެ މަސައްކަތް ކުރިއަށްދާ ގޮތުގެ އެންމެ ފަހުގެ މައުލޫމާތު އޮޅުން ފިލުއްވާފަ އެވެ. އެގޮތުން ތިލަމާލެ ބްރިޖުގެ 42 އިންސައްތަ މަސައްކަތް ނިމިފައިވާކަމަށް އެފްކޮންސްއިން ވަނީ މައުލޫމާތު ދީފަ އެވެ.
ޖައިޝަންކަރު ވިދާޅުވީ މި މަޝްރޫއުގެ ސަބަބުން ރާއްޖެ އާއި އިންޑިއާގެ ގުޅުން އިތުރުވެ އިގްތިސާދަށް ކުރިއެރުން ލިބިގެންދާނެ ކަމަށެވެ.
މަޝްރޫއުއަށް ލޯނު ދިނީ އިންޑިއާގެ އެގްޒިމް ބޭންކުން
އަގު: 500 މިލިއަން ޑޮލަރު (6.2 ބިލިއަން ރުފިޔާ)
100 މިލިއަން ޑޮލަރު (1.55 ބިލިއަން ރުފިޔާ) އަކީ އިންޑިއާގެ ހިލޭ އެހީ
ބްރިޖުގެ މަސައްކަތުގައި ތުރުކީ، ޖަރުމަން އަދި އޮސްޓްރޭލިޔާގެ މާހިރުން ވެސް ބައިވެރިވޭ
