މާލޭ ސިޓީ ކައުންސިލް މެމްބަރުންނާއި ބައްދަލުކުރެއްވުމަށް ފަހު ނޫސްވެރިންނާއި ވާހަކަ ދައްކަވަމުން ރައީސް ޑރ، މުއިއްޒު ވިދާޅުވީ މި ސަރުކާރުގެ ހާރިޖީ ސިޔާސަތަކީ ހުރިހާ ގައުމަކާ ވެސް ގުޅިގެން ކުރިއަށް ދިޔުން ކަމަށާއި އެއީ ރިޔާސީ މެނިފެސްޓޯގައި ވެސް އިއުލާންކުރެއްވި ގޮތްކަމަށެވެ.
އަދި އޭރުވެސް އިންޑިއާ ބާކީ ނުކުރައްވާ ކަމަށާއި މިއަދުވެސް ތަންފީޒު ކުރައްވަމުން ގެންދަވަނީ އެ ސިޔާސަތު ކަމަށްވެސް ރައީސް ޑރ. މުއިއްޒު ވިދާޅުވިއެވެ.
ރައްޔިތުންގެ ކަންބޮޑުވުމަކަށްވީ އިންޑިއާ ސިފައިން ރާއްޖޭގައި ތިބުންކަމަށާއި އެކަން މަޝްވަރާގެ މަތިން ހައްލުކޮށް އިންޑިއާ ސިފައިން ފޮނުވާލާފައިވާކަން ރައީސް ޑރ. މުއިއްޒު ފާހަގަކުރެއްވިއެވެ. އަދި މިހާރުވެސް ރާއްޖެއަށް އިންޑިއާގެ ފަރާތުން ލިބޭ އެހީތަކާއި ފައިދާތައްވެސް ލިބެމުން އަންނަކަމަށްވެސް ރައީސް ވިދާޅުވިއެވެ.
އިންޑިއާއި ގުޅުން ބަދަހިކޮށް މި ސަރުކާރުގެ ހާރިޖީ ސިޔާސަތަށް ގެނައި ބަދަލަށް މަރުހަބާ ކިޔާކަމަށް ރޭ އެމްޑީޕީގެ ރައީސް އަބްދުﷲ ޝާހިދު ވަނީ ވިދާޅުވެފައެވެ. އަދި އިންޑިއާ އައުޓް ކެމްޕެއިނަކީ ރާއްޖޭގެ ރައްޔިތުންނަށް އޮޅުވާލުމަށް ހިންގުނު ހަގީގަތާ ހިލާފު ފިތުނަވެރި ކެމްޕެއިނެއްކަން ފާހަގަކޮށް ރައްޔިތުން ކިބައިން ސަރުކާރުން މައާފަށް އެދެންޖެހޭކަމަަށްވެސް އިދިކޮޅޫ އެމްޑީޕީގެ ރައީސް އަބްދުﷲ ޝާހިދު ރޭ ވަނީ ވިދާޅުވެފައެވެ.
އިންޑިއާ ރާއްޖޭގެ ގުޅުމުގެ ތެރެއިން އެގައުމުގެ އެކްސްޓާނަލް އެފެއާޒް މިނިސްޓަރު ޖައިޝަންކަރު މިހާރު ގެންދަވަނީ ރާއްޖެއަށް ރަސްމީ ދަތުރުފުޅެއް ކުރައްވަމުންނެވެ. މި ދަތުރުފުޅުގައި ކައިޝަންކަރު ވަނީ އިންޑިއާ ސަރުކާރުގެ އެހީގައި ހިންގާފައިވާ ބައެއް މަޝްރޫތަކުގެ މަސައްކަތް ނިންމާ ދިވެހި ސަރުކާރާއި ހަވާލުކޮށްފައެވެ.
