މާލޭ ސިޓީ ކައުންސިލް މެމްބަރުންނާ ބައްދަލުކުރައްވާ ވާހަކަދައްކަވަމުން ރައީސް މުއިއްޒު ވިދާޅުވީ ކޮންމެ ކަމެއްވެސް ބޭނުންފުޅު ވަނީ ކައުންސިލްއާ ގުޅިގެން ދިޔުމަށްކަމަށާއި މާލޭ ސިޓީ ކައުންސިލުން ރައްޔިތުނަށް ހިދުމަތް ދިނުމުގައި ސަރުކާރުގެ ފަރާތުން ފުރިހަަމަ އެއްބާރުލުން ދޭނެ ކަމުގެ ޔަގީންކަންވެސް ރައީސް މުއިއްޒު ދެއްވި އެވެ.
ދުވަހުން ދުވަަހަށް މިނުސިޕަލް ހިދުމަތް ދިނުމުގައި ކަމަށްވިޔަސް ރައްޔިތުންގެ ކަންބޮޑުވުންތައް ސަރުކާރާ ހަމައަށް ސިޓީ ކައުންސިލްގެ ފަރާތުން ގެނެސްދޭނެ މަގެއް ހޯދައި ފަސެހަކަމާއިއެކު ކުރެވޭނެ ގޮތެއް މަގުފަހިކޮށްދެއްވާނެކަމަށް ރައީސް ވިދާޅުވި އެވެ.
ލާމަރުކަޒީ ނިޒާމު ފުރިހަމައަށް ހަރުދަނާ ކުރުމަށް ބަދަލު ގެންނައިރު ރައްޔިތުންގެ ރެޕްރެސެންޓޭޝަން ނުވަތަ ތަމްސީލުވާ މިންވަރު އެންމެ ތަންކޮޅެއްވެސް ކުޑަވާކަށް ބޭނުމެއް ނޫންކަމަށް ރައީސް ވިދާޅުވި އެވެ. ރައްޔިތުންގެ ރެޕްރެސެންޓޭޝަން އޮންނަންޖެހޭ ނަަމަވެސް ކުރިއަށްގެންދާނީ މިހާރަށްވުރެ ތަންކޮޅެއް ބަރުހެލިކަން ކުޑަ ގޮތަކަށްކަން ރައީސް ވިދާޅުވި އެވެ.
އެގޮތުން މިހާރަށްވުރެ ބައެއް ރަށްރަށުގައި ހުންނަ ކައުންސިލުންގެ އަދަދު މަދުވެގެންދާނެކަމަށާއި އެހެންނަމަވެސް ލާމަރުކަޒީ ނިޒާމް މިހާރަށްވުރެ ފުރިހަމަވެގެންދާނެކަމަށް ރައީސް ވިދާޅުވި އެވެ.
ރަށު ކައުންސިލަރުންގެ އަދަދު މަދުކުރައްވާނެ ކަމަށާއި އަދި އަދި އަތޮޅު ކައުންސިލްއަށްވެސް ބައެއް ބަދަލު ގެންނަވާނެކަމަށް ރައީސް މީގެ ކުރިން ވިދާޅުވެފައިވެއެވެ. އެކަން އުސޫލަށް ކުރެވިއްޖެ ނަމަ ދައުލަތުން ކުރާ ހަރަދުގެ ބޮޑު މިންވަރެއް ސަލާމަތް ކުރެވޭނެ ކަމަށް ފާހަގަކޮށް ރައީސް ވިދާޅުވީ ސަލަމަތް ކުރެވެ ފައިސާ އިން ރައްޔިތުންނަށް ތަރައްގީގެ ގިނަ މަޝްރޫއުތަކެއް ކުރިއަށް ގެންދެވޭނަކަމަށެވެ.
އާބާދީގައި 3،000 އަށް ވުރެ މަދުން މީހުން ދިރިއުޅޭ ރަށްރަަށަށް ތިން ކައުންސިލަރުން ހޮވުމުން ފުދޭނެ ކަމަަށްވެސް ރައީސް މުއިއްޒު ވިދާޅުވެފައި ވެ އެވެ.
