ވަޒީރު މިހެން ވިދަޅުވީ ރައްޔިތުން މަޖލީހުގެ މެމްބަރަކު ކުރެއްވި ސުވާލަށް ޖަވާބު ދެއްވަމުންނެވެ.
ބިންވެރިޔާ ސްކީމް'ގެ ދަށުން މިދިޔަ ސަރުކާރުން ހުޅުމާލެ ފޭސްދޭގައި ދޫކުރި ބައެއް ބިންތަކުގައި ކެފޭ ހަދާ ހޮޓާ ވިޔަފާރިކުރާ މައްސަލަ ވަނީ ބޮޑުވެފައެވެ. އެ ސަރަހައްދުން ދޫކޮށްފައި ހުރި ގިނަ ބިންތަކުގައި ވަށާ ފާރު ރާނާ ގިނަ ބަޔަކު އަންނަނީ ކެފޭ ހިންގަމުންނެވެ.
މިނިސްޓަރު ހައިދަރު ވިދާޅުވީ ބޯހިޔާވަހިކަމަށް ދީފައިވާ ތަނެއް އެކަމަށް ބޭނުންނުކޮސް ވިޔަފާރިއަށް ބޭނުންކުރާތީ އެކަމުގެ ކަނބޮޑުވުން އޮތްކަމަށެވެ.
" އަޅުގަނޑުމެން އެ މައުލޫމާތު އެއްކުރުމުގެ މަސައްކަތް މިހާރު ކުރަމުން މިދަނީ. އިރާދަކުރެއްވިއްޔާ އެކަމަށް ހައްލުތަކެއް ހުށައަޅައިގެން އަޅުގަނޑުމެން ކުރިޔަށް ގެންދާނަން." ވަޒީރު ހައިދަރު ވިދާޅުވިއެވެ.
މިދިޔަ ސަރުކާރުން ހިނގި ބިންވެރިޔާގެ ސްކީމުން ހުޅުމާލޭ ފޭސް ދޭކުން ގޯތި ލިބުނު މީހުންގެ ތެރެއިން މިހާތަނަށް ޖުމްލަ 624 ގޯތި ވަނީ ވެރި ފަރާތްތަކާއި ހަވާލުކޮށްފައެވެ.
ހުޅުމާލެއިން ޖުމްލަ 1,408 ގޯތި ދޫކުރުމަށް ހަމަޖެހިފައިވާއިރު، މިހާތަނަށް ހަވާލުނުކުރެވިފައިވަނީ 784 ގޯއްޗެވެ.
ބިންވެރިޔާ ސްކީމްގެ ދަށުން ގޯއްޗަށް އެދި ޖުމްލަ 23،088 މީހުން ހުށަހެޅިއެވެ. އޭގެ ތެރެއިން 19,000 ގިނަމީހުން ބަންޑާރަ ގޯއްޗަށް ޝަރުތު ހަމަވާކަމަށް ކުރީ ސަރުކާރުން ވަނީ ނިންމާފައެވެ.
