އެ އިދާރާއިން ވަނީ މާލެ އަތޮޅުން ފެށިގެން އައްޑޫ ސިޓީއާ ދެމެދުގެ ހުރިހާ ރަށްތަކަށް ހުދު ސަމާލު ނެރެފައެވެ. އެލާޓް ނެރެފައިވަނީ ހެނދުނު 06:30 ފެށިގެން މެންދުރު 12:30 އާ ހަމައަށެވެ.
މެޓް އޮފީހުން ބުނީ މާލެ އަތޮޅުން ފެށިގެން އައްޑޫ ސިޓީއާ ދެމެދުގެ ހުރިހާ ރަށްތަކަށް ގުގުރުމާއި އެކު ބޯކޮށް ވާރޭވެހޭނެކަމަށެވެ. ގަޑިއަކު 19 މޭލާއި 24 މޭލާއި ދެމެދުގެ ބާރުމިނުގައި ވައިޖެހި ވިލާގަނޑުގައި 45 މޭލަށް ވައިގަދަވާނެކަަމަށް ލަފާކުރެވޭކަމަށްވެސް މެޓް އޮފީހުން ބުނެއެވެ. އަދި ރާއްޖޭގެ ކަނޑުތައް ވަރަށް ގަދަވާނެކަމަށްވެސް މޫސުމާއި ބެހޭ ގައުމީ އިދާރާއިން ބުނެއެވެ.
އިއްޔެ ކުރި ވިއްސާރާގައި ރަށެއްގައި ފެންބޮޑުވެފައި.
މިހާރު ކުރަމުން މިދާ ވިއްސާރާގައި އިއްޔެ 9 ރަށަކުން ވައިގަދަވެގެންނާއި ފެންބޮޑުވެގެން ވަނީ ރިޕޯޓު ކޮށްފައިވާކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީން ވަނީ ބުނެފައެވެ. އެހެންނަމަވެސް އެއްވެސް އާއިލާއެއް ބަދަލުކުރަންޖެހޭ ފަދަ ހާލަތެއް ނެތްކަމަށްވެސް އެ އިދާރާއިން ވަނީ ބުނެފައެވެ.
ވައިގަދަވެ، ފެން ބޮޑުވެގެން ރިޕޯޓްކޮށްފައިވަނީ ސ.މަރަދު، ސ.ފޭދޫ،ސ.ހިތަދޫ، ގއ.ދެއްވަދޫ، ޅ.ނައިފަރު، ޅ.ކުރެންދޫ، ކުޅުދުއްފުށި ސިޓީ، ހއ.ބާރަށް، ހއ.ދިއްދޫއިންކަމަށް އެންޑީއެމްއިން ބުނެއެވެ.
