މަޖިލީހުގެ މެމްބަރުން ކުރެއްވި ސުވާލަކަށް ޖަވާބު ދެއްވަމުން މިނިސްޓަރު މުއްތަލިބު ވިދާޅުވީ ފެނަކައިން ރާއްޖޭގެ އެކި ހިސާބުގައި ހިންގަމުން ގެންދިޔަ ފެނާއި ނަރުދަމާގެެ މަޝްރޫއުތައް އެއް މަސައްކަތެއްގެ ގޮތުގައި އެމްޑަބްލިއެސްސީއާއި ހަވާލުކޮށްފައިވާކަމަށެވެ.
20 މަޝްރޫއެއް ހަވާލުކުރާތާ 720 ދުވަހުގެ ތެރޭގައި ނިންމަން އެމްޑަބްލިއުއެސްސީެއާއި ހަވާލުކރާއިރު އެ ހުރިހާ މަޝްރޫއެއްގެ އަގު 1 ބިލިއަން ރުފިޔާއަށް އަރާކަމަށް މިނިސްޓަރު މުއްތަލިބި ވިދާޅުވިއެވެ. އަދި ޓެންޑާ ބޯޑުން އެ މަޝްރޫއުތައް ހަވާލުކުރަން ނިންމިހާ އަވަހަކަށް އެއްބަސްވުމުގެ ސޮއިކުރާނެކަމަށް މިނިސްޓަރު މުއްތަލިބު ވިދާޅުވިއެވެ.
23 ރަށެއްގައި ފެނާއި ނަރުދަމާގެ މަސައްކަތް ކުރުމަށް މިދިޔަ ސަރުކާރުން ވަނީ ފެނަކައާއި ހަވާލުކޮށްފައެވެ. އޭގެތެރޭގައި ހިމެނެނީ ސާފު ފެން ފޯރުކޮށްދިނުމުގެ 16 މަޝްރޫއަކާއި ނަރުދަމާއި ނިޒާމު ގާއިމުކުރުމުގެ 5 މަޝްރޫއެއް ހިމެނެއެވެ. މި މަޝްރޫއުތަކުގެ ޖުމްލަ އަގު 600 މިލިއަނަށް ވުރެ މައްޗަށް އަރައެވެ. މީގެއިތުރުން 11 ރަށެއްގައި އައިސް ޕްލާންޓް އެޅުމުގެ މަސައްކަތްވެސް އޮތީ ފެނަކައާއި ހަވާލުކޮށްފައެވެ.
ފެނަކައިން ހިންގަމުން އައި މަޝްރޫއުތައް އެކަމާއި ގުޅޭ ދާއިރާތަކަށް ހަވާލުކުރަން އެ ކުންފުނިން ވަނީ ނިންމާފައެވެ. އެގޮތުން އެ ކުންފުނިން ހިންގަމުން ގެންދިޔަ އައިސްޕްލާންޓަތައް އިމާރާތްކުރުމާއި ހިންގުން ވަނީ ހުއްޓާލާފައެވެ. އައިސްޕްލާންޓްތައް ހިންގުމުން އެކަނިވެސް އަހަރަކަށް 12 މިލިއަން ރުފިޔާ ގެއްލުންވަމުންދާކަމަށް ފެނަކައިން ވަނީ ބުނެފައެވެ.
