"ސީއެންއެމް" އަށް މައުލޫމާތު ދެއްވަމުން ކެލާ ކައުންސިލް ރައީސް އިންފާޒް ވިދާޅުވީ ވިއްސާރާގައި ފެން ބޮޑުވެފައި ހުރުމުގެ ސަބަބުން މިހާރު ކުރިއަށް ދަނީ ހިއްކުމުގެ މަސައްކަތް ކަމަށެވެ.
ރަށުގެ ބައެއް ބައެއް ގޭގެއިން މީހުންވެސް ނެރެންޖެހޭ ހާލަތުގައި ހުރިއިރު ކެލާ ސްކޫލްވެސް ބަންދުކޮށްފައިވާކަމަށް ކައުންސިލް ރައީސް ވިދާޅުވިއެވެ.
މިވަގުތު އެއްގެއިން މީހުން ބަދަލުކުރަން ރިކުއެސްޓް ފޮނުވާފައި އޮތްކަމަށް ފާހަގަކޮށް އިންފާޒް ވިދަޅުވީ ބައެއް ގޭގެއިން ހިފާ ގެންގުޅޭ ސާމާނާއި އަދި ފަރުނީޗަރު ފަދަ ތަކެތިވެސް ވަރަށް ބޮޑަށް ހަލާކުވެފައިވާ ކަމަށެވެ. އަދި ގާތްގަނޑަކަށް ރަށުގެ 10 ވަރަކަށް ގެއަކުން ބޮޑެތި ގެއްލުން ލިބިފައިވާކަމަށްވެސް ކައުންސިލް ރައީސް ވިދާޅުވި އެވެ.
ކެލާގެ ގެއްގައި ފެންބޮޑުވެ ލިބުނު ގެއްލުން ފޮޓޯ: ކެލާ ކައުންސިލް
ފެން ހިންދުމުގެ މަސައްކަތް ކުރިއަށްދާގޮތުގެ މައުލޫމާތު ދެއްވަމުން ކައުންސިލް ރައީސް ވިދާޅުވީ މިވަގުތު ރަށުގައި ހުރީ 1 ޕަމްޕު ކަމަށާއި އެ ޕަމްޕުގެ އިތުރުން ރަށު ތެރޭގައި 5 ދިމާލަކުން ކޯރު ކޮނެ ފެންތައް މޫދަށް ފޮނުވާލެވޭގޮތައް ހިންދުމުގެ މަސައްކަތް ކުރަމުން އަންނަ ކަމަށެވެ.
ފެންބޮޑުވުމުގެ ސަބަބުން ފެންތައް މޫދަށްދާގޮތަށް މަގު ކޮނެފައި
އުތުރާއި މެދު ރާއްޖެ ތެރެއަށް މެޓް އޮފީހުން ދަނީ ތަކުރާރުކޮށް މޫސުމާ ބެހޭ ސަމާލުތަކާއި އިންޒާރުތައް ނެރެމުންނެވެ. މެޓުން މީގެ ކުރިން ބުނީ މި ހުޅަނގު މޫސުމުގެ ބާރު ގަދަވެ ކުރާ މި ވިއްސާރަ ހަފުތާ ބަންދާ ހަމައަށް ކުރާނެ ކަމަށެވެ.
ރާއްޖޭގެ ހުރިހާ ސަރަހައްދެއްގެ ކަނޑުތައް ވެސް ގަދަވެ، ވިލާގަނޑުގައި ވަރަށް ގަދަވާނެ ކަމަށް ލަފާކުރެވެ އެވެ. ދިޔަވަރު ބޮޑުވާ ވަގުތުތަކުގައި ރަށްރަށަށް އުދަ އެރުން ވެސް އެކަށީގެންވެ އެވެ.
