ރާއްޖެއަށް މިހާރު ކުރަމުންދާ ވިއްސާރައާއި ގުޅިގެން، މާދަމާ ސަރުކާރު ބަންދު ދުވަހެއްކަމުގައި ރައީސުލްޖުމްހޫރިއްޔާ ވަނީ ހަމަޖައްސަވައިފަ އެވެ.
ނަމަވެސް ރައްޔިތުންގެ މަޖިލިހުގެ ރައީސް އަބްދުއްރަހީމް ނިންމެވީ ކުރިން ވެސް ތާވަލް ކޮށްފައިވާ ގޮތަށް މަޖިލިހުގެ މާދަމާގެ ޖަލްސާ ބާއްވާށެވެ. ޖަލްސާ ފަށާނީ އެހެން ދުވަސްތަކެކޭ ވެސް އެއްގޮތަށް ހެނދުނު 9:00 ގަ އެވެ.
މާދަމާ އޮންނަ 20 ވަނަ މަޖިލީހުގެ 28 ވަނަ ޖަލްސާގެ އެޖެންޑާވެސް މަޖިލީހުން މިހާރު ވަނީ އާންމުކޮށްފަ އެވެ. ސަރުކާރުގެ ފަރާތުން ބިލެއް ހުށަހެޅުމާއި މިހާރު މަޖިލީހުގައި އޮތް ތިން ބިލަކަށް ބަހުސް ކުރުމުގެ އިތުރުން ޖަލްސާގައި ބ. ކެންދޫ ދާއިރާގެ އެމްޑީޕީގެ މެމްބަރު މައުރޫފު ޒާކިރު، ސްޕޯޓްސް މިނިސްޓަރު އަބްދުﷲ ރާފިއު މަޖިލީހަށް ހާޒިރުކޮށް ސުވާލުކުރުން ވެސް މާދަމާގެ ޖަލްސާއަށް ވަނީ އެޖެންޑާކޮށްފަ އެވެ.
ރައްޔިތުންގެ މަޖިލިހުގެ މިއަދުގެ ޖަލްސާގައި ވަނީ މި ދައުރުގެ ޗުއްޓީ އަށް ދިއުން ދެ ހަފުތާއަށް ފަސްކޮށް، މި ދައުރު ދަންމާލުމަށެވެ.
ހުޅަނގު މޫސުމުގެ ބާރުގަދަވެ، މި ދުވަސްވަރު މުޅި ރާއްޖެއަށް މޫސުން ވަނީ ގޯސްވެފަ އެވެ. މިހާރު މޫސުން އެންމެ ގޯހީ ރާއްޖޭގެ އުތުރުގެ ރަށްތަކަށެވެ. މެޓުން އިއްޔެ ވަނީ ހަތަރު ގަޑިއިރަށް ހއ. އަތޮޅުން ފެށިގެން ށ. އަތޮޅަށް އޮރެންޖު އެލާޓް ވެސް ނެރެފަ އެވެ. އެ ހިސާބުގެ ބައެއް ރަށްތަކުގައި ވަރަށް ބޮޑަށް ފެންބޮޑުވެގެން އެންޑީއެމްއޭ އަށް ރިޕޯޓު ވެސް ކޮށްފައިވެ އެވެ.
މެޓް އޮފީހުން ލަފާކޮށްފައިވާ ގޮތުގައި ކުރިއަށް އޮތް ފަސް ދުވަހު ވެސް ރާއްޖޭގެ ބޮޑު ބަޔަކަށް ވިއްސާކޮށް، ވަރަށް ވައިގަދަވާނެ އެވެ. އުތުރާއި މެދު ރާއްޖެ ތެރޭގެ ރަށްތަކަށް ވައިޖެހެނީ 17 މޭލާއި 27 މޭލާ ދެމެދުގެ ބާރުމިނުގަ އެވެ. އަދި ދެކުނުގެ ރަށްތަކަށް ވައިޖެހޭނީ ގަޑިއަކު 13 މޭލާއި 23 މޭލާ ދެމެދުގެ ބާރުމިނުގަ އެވެ. އަދި ވިލާގަނޑުގައި ގަޑިއަކު 60 މޭލަށް ވައިގަދަވުން އެކަށީގެންވެ އެވެ.
