މިއީ، ކުޑަކުއްޖަކަށް ޖިންސީ ގޯނާކުރި މައްސަލައެއްގައި ދައުވާލިބޭ މީހާއަކީ "އިސްކުރު މަދު މީހެއް" ކަމަށް ބުނެ އޭނާގެ މައްސަލަ ގދ. ތިނަދޫ މެޖިސްޓްރޭޓް ކޯޓަކުން ބޭރުކޮށްލި މައްސަލައެވެ.
ޖިންސީ ގޯނާގެ މައްސަލައެއްގައި ދައުވާލިބުނު މީހާއަކީ ދައުވާ ލިބިގަތުމަށް ނުކުޅެދިގެންވާ މީހެއް ކަމުގައި ގދ. ތިނަދޫ ކޯޓުން ނިންމީ އޭނާއާ ބެހޭގޮތުން ޑޮކްޓަރުން ބުނެފައިވާ ވާހަކަތަކަށް ބަލާއިރު އެއީ ދިފާއުގައި ވާހަކަ ދެއްކުމުގެ ގާބިލްކަން ނެތް "އިސްކުރު މަދު މީހެއް" ކަމަށް ބުނެ އެވެ. އެ މައްސަލަ ހައިކޯޓަށް ހުށަހެޅީ ޕްރޮސިކިއުޓަރ ޖެނެރަލްއެވެ.
އެ މައްސަލަ ދައުލަތުން އިސްތިއުނާފް ކުރުމުން ހައިކޯޓުން ވަނީ އެ މީހާއާ ބެހޭގޮތުން ޑޮކްޓަރު ދީފައިވާ ރިޕޯޓަށް ބަލާއިރު، އޭނާއަކީ އާންމު ވިސްނުމާ އެކަށީގެންވާ ވަރަށް ކަންކަން ދެނެގަތުމުގެ ގާބިލްކަން ހުރި މީހެއް ކަމަށާއި އެހެންވެ، އޭނާއަކީ އެފަދަ ނުކުޅެދިގެންވާ މީހެއް ކަމަށް ދޭހަވާ ގޮތެއް ނެތް ކަމަށެވެ. މުޖްތަމައުގައި ހުންނަ ސުވާލު އުފެދޭ ބަސްތައް ކޯޓުތަކުގެ ނިންމުންތަކުގައި ބަޔާން ކުރުމަކީ އެދެވޭ ކަމެއް ނޫން ކަމަށް ހުކުމުގައިވެ އެވެ.
މި މައްސަލައިގައި ހައިކޯޓުން ހުކުމް ކުރީ، ފަނޑިޔާރު ފާތިމަތު ފަރުހީޒާ އާއި ފަނޑިޔާރު ހުޒައިފާ މުހައްމަދު އަދި ފަނޑިޔާރު މުހައްމަދު ފައިސަލެވެ.
