ޕީޖީ އޮފީހުގެ އޮފިޝަލަކު ވިދާޅުވީ ޝަމްނާޒް މައްޗަށް ދައުވާ ނުކުރަން ނިންމީ އެއްވސް މިންވަރަކަށް ހެއްކެއް ނެތުމުންކަމަށެވެ. ޝަމްނާޒްގެ މައްޗަށް ދައުވާކުރަން ޕީޖީއާއި އެކު މަޝްވާތައް ފުލުހުން ފެށީ މިދިޔަ މަހުގެ 23 ވަނަދުވަހުއެވެ،
ރައީސް ޑރ މުހައްމަދު މުއިއްޒު، ހިތްޕުޅާވޭތޯ "އިސްތިރި" އެއް ހެދި ކަމަށް ތުހުމަތު ކުރެވިގެން ޝަމްނާޒް ހައްޔަރުކުރީ މިދިޔަ ޖޫން މަހުގެ 23 ވަނަދުވަހުއެވެ. ޝަމްނާޒާއި އެކު އޭނާގެ ކޮއްކޮ ހައްވާ ސަނާ ސަލީމް އިތުރު ތ. ކިނބިދޫ ހުސައިން ސަމީރުވެސް ހައްޔަރުކުރި އެވެ. މި ތިން މީހުންތެރެއިން ޝަމްނާޒާއި އެނާގެ ކޮއްކޮގެ ބަންދުގެ މުއްދަތު ކޯޓުން 2 ފަހަރެއްގެ މަތިން އިތުރުކުރުމަށް ފަހު ފުލުހުން އެ މީހުން ދޫކޮށްލީ ބަންދުގައި 20 ދުވަހު ބޭއްތިއްބުމަށްފަހުއެވެ.
މި މައްސަލާގައި މި ތިން މީހުންވެސް ހައްޔަރުކުރީ ފުލުހުންގެ އިންޓެލިޖެންސް ރިޕޯޓެއްގެ މައްޗަށް ބިނާކޮށެވެ.
ރައީސް ޑރ މުހައްމަދު މުއިއްޒު، ހިތްޕުޅާވޭތޯ "އިސްތިރި" އެއް ހެދި ކަމަށް ތުހުމަތު ކުރެވިގެން ފާތިމަތު ޝަމްނާޒް އަލީ ސަލީމް ހައްޔަރުކުރި ނަމަވެސް އެކަމާއި ރައީސްގެ ދެ ކަނބަލުންނާއި ގުޅުމެއް ނެތްކަމަށް ރައީސް އޮފީހުން ވަނީ ބުނެފައެވެ. އަދި އެ މައްސަލަ ހުށައެޅީ މުލިއާގެއިން ނޫންކަމަށްވެސް ވަނީ ބުނެފައެވެ.
މި މައްސަލަ ފެންމަތިވުމުން ޝަމްނާޒާާއި އޭނާގެ ކޮއްކޮގެ އިތުރުން އޭނާގެ ކުރީގެ ފިރިމިހާ އާދަމް ރަމީޒު ވަނީ މަގާމުން ސަސްޕެންޑްކޮށްފައެވެ.
ރައީސް ޑރ. މުއިއްޒާއި ވަރަށް އަރިސްކޮށް އުޅުއްވި ރަމީޒު ހުންނެވީ ރައީސް އޮފީހުންގެ މިނިސްޓަރުގެ މަގާމުގައެވެ. ޝަމްނާޒް ހުރީ ތިމާވެއްޓާ ބެހޭ މިނިސްޓްރީގެ ސްޓޭޓް މިނިސްޓަރުކަމުގެ މަގާމުގައެވެ. އޭނާގެ ކޮއްކޮ ސަނާ ހުރީ އެ މިނިސްޓްރީގެ ސީނިއަރ ޕޮލިޓިކަލް ޑިރެކްޓަރުގެ މަގާމުގައެވެ.
