ރާމަﷲ ގައި ގާއިމުކޮށްފައިވާ ޕަލެސްޓައިން އޮތޯރިޓީ (ޕީއޭ) ލީޑަރު އައްބާސް މިފަދައިން ވިދާޅުވީ، ތުރުކީވިލާތުގެ ރައީސް ރަޖަބު ތައްޔިބު އުރުދުގާން އާއި ބައްދަލު ކުރެއްވުމަށް އެގައުމަށް ވަޑައިގެން، އެގައުމުގެ ގާނޫނު ހަދާ މަޖިލީހުގައި ދެއްވި ތަގުރީރެއްގަ އެވެ.
އައްބާސް ވިދާޅުވީ އިޒްރޭލުން ކިތަންމެ ވަރަކަށް ހަމަލާ ދިނަސް ފަލަސްތީނު ރައްޔިތުންގެ ހިތްވަރު ބަލިނުވާ ކަމަށެވެ. އަދި އިޒްރޭލުން ކެނޑިނޭޅި ހަމަލާ ދެމުން ގެންދާ ފަލަސްތީނުގެ ގާޒާއަށް ވަޑައިގަންނަވާނެ ކަމަށާއި މަރުވިޔަސް ފަރުވާލެއް ނެތް ކަމަށް އައްބާސް ވިދާޅުވި އެވެ.
ހުޅަނގު އައްސޭރީގެ ރާމަﷲގަ ދިރިއުޅުއްވާ އައްބާސް ވިދާޅުވީ ތުއްތު ކުއްޖެއްގެ ފުރާނައަށްވުރެ އޭނާގެ ފުރާނަ އަގު ބޮޑެއް ނުވާނެ ކަމަށާއި ފަލަސްތީނުގެ ރައްޔިތުން ބަލި ގަބޫލުކޮށް، އިސްރާއީލުގެ ފައިބުޑަށް ނުވެއްޓޭނެ ކަމަށެވެ.
އައްބާސް އަކީ ފަލަސްތީނުގެ ރައީސްގެ ގޮތުގައި ބަލައިގަންނައިރު އިޒްރޭލުން ހަމަލާ ދެމުން ގެންދާ ގާޒާއިން އައްބާސްގެ ބާރު 2007 ވަނަ އަހަރު ކަނޑުވާލުމަށް ފަހު އެތަނުގައި ވަކިން ވެރިކަން ކުރަމުން އަންނަނީ ހަމާސް އެވެ.
އައްބާސް މި މޭރުމުން ވާހަކަ ދެއްކެވި އިރު، "ހަމާސް" ނެތިކޮށްލުމުގެ ނަމުގައި އިޒްރޭލުން ގާޒާގައި ހިންގަމުންދާ ގަތުލްއާންމުގައި މިހާތަނަށް 40،200 އާ ގާތްކުރާ އަދަދަށް މީހުން ވަނީ ޝަހީދުވެފަ އެވެ. އޭގެ ތެރޭގައި ގިނައީ ކުށެއްނެތް ކުޑަކުދިންނާއި އަންހެނުންނެވެ.
ގަތުލްއާންމު ހުއްޓުވަން މިހާތަނަށް ކުރަމުންދާ މަސައްކަތަށް އެއްވެސް ކުރިއެރުމެއް ލިބިފައެއް ނުވެ އެވެ. އެގޮތުން އިޒްރޭލުން ހަނގުރާމަ ހުއްޓާލަން އެއްވެސް ގައުމަކާއެކު އެއްބަސްވާން ވަނީ ދެކޮޅު ހަދާފަ އެވެ.
