އުމުރުން 35 އަހަރުގެ ރެއުސް، އެލްއޭ ގެލެކްސީއަށް ބަދަލުވީ ދެ އަހަރާއި ބައިގެ އެއްބަސްވުމެއްގެ ދަށުންނެވެ. ރެއުސް އަކީ މިދިޔަ ސީޒަން ނިމުނުއިރު ޑޯޓްމަންޑް ދޫކޮށްލުމަށް ފަހު ފްރީ އޭޖެންޓެއްގެ ގޮތުގައި ހުރި ކުޅުންތެރިއެކެވެ. އޭނާވަނީ ޗެމްޕިއަންސް ލީގުގެ ފައިނަލްގައި މިދިޔަ ސީޒަންގައި ރިއާލް އަތުން ޑޯޓްމަންޑް ބަލިވި މެޗުގައި ކުޅެފައެވެ.
ރެއުސްވަނީ ޖަރުމަނުގެ ކްލަބުގައި 12 އަހަރު ހޭދަކުރި އިރު، ހުރިހާ މުބާރާތެއްގައި 429 މެޗު ކުޅެ 170 ގޯލް ޖަހާފައެވެ. އަދި ޖަރުމަނުގެ ގައުމީ ޓީމަށް 48 މެޗު ކުޅުނު އިރު، ޔޫރޯ 2012 އަދި 2018 ވަނަ އަހަރުގެ ވޯލްޑްކަޕުގައިވެސް ކުޅުނެވެ. އޭނާވަނީ ދެ ފަހަރު، ބުންޑަސްލީގާގެ އެންމެ މޮޅު ކުޅުންތެރިޔާގެ މަގާމު ހޯދާފައެވެ.
އެމެރިކާގެ މޭޖާ ލީގު ސޮކާގެ ވެސްޓް ކޮންފަރެންސްގެ އެއްވަނައިގައި މިވަގުތު އޮތީ އެލްއޭ ގެލެކްސީއެވެ. އަދި މުޅި ޓޭބަލަށް ބަލާނަމަ، މެސީގެ އިންޓަ މިއާމީގެ ފަހަތުން ދެވަނައިގައި އޮތީ އެލްއޭ ގެލެކްސީއެވެ. އެލްއޭ ގެލެކްސީގެ މެޗެއް އަންނަ ހަފްތާގައި އޮންނަ އިރު އެ މެޗުގައި ރުއެސް ފެނިދާނެއެވެ.
