އައިއޭއެސް އިން ބުނީ، ފައިނޭންސް ލީސް ކޮށްދިނުމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމަށް ހުޅުވާލާފައިވާ ކަމަށާއި، މަތިންދާ ބޯޓު ގެނެސްދޭނެ ބަޔަކު ހޯދަނީ ދިގު މުއްދަތުން ފައިސާ ދައްކާ ހަލާސްކުރާ ގޮތަށް ކަމަށެވެ.
އެ އެއާލައިންގެ އެތެރޭގެ އުދުހުންތަކުގައި ބޭނުން ކުރަން މުޅިން އާ އޭޓީއާރު 600-42 މަރުކާގެ މަތިންދާބޯޓް މޯލްޑިވިއަން އަށް ބޭނުން ވަނީ 15 އަހަރުގެ މުއްދަތުން ފައިސާ ދައްކާ ހަލާސްކުރާ ގޮތަށް ކަމަށް އައިއޭއެސް އިންބުނެ އެވެ.
އައިއޭއެސް އިން ބުނީ، އެ އެއާލައިނުން އެއް ބޯޓު މި އަހަރުގެ ޑިސެމްބަރަށް، އަނެއް ބޯޓު އަންނަ އަހަރުގެ އޮގަސްޓަށް އަދި ފަހު ބޯޓު 2026 ގެ އޮކްޓޯބަރަށް ބޭނުންވާ ކަމަށެވެ. އަދި މި ފުރުސަތު އައިއޭއެސް އިން ހުޅުވާލާފައިވަނީ، މަތިންދާ ބޯޓު ގެންގުޅޭ ފަރާތްތަކަށާއި ބޯޓު ކުއްޔަށް ދޭ ކުންފުނިތަކާއި ކޮމާޝަލް ބޭންކުތަކަށް އަދި މާލީ ކުންފުނިތަކަށް ކަމަށެވެ.
މިކަމަށް ޝައުގުވެރިވާ ފަރާތްތަކަށް މިމަހުގެ 29 ވަނަ ދުވަހާއި ހަމައަށް ޕްރޮޕޯސަލް ހުށަހެޅޭނެ ކަމަށް އައިއޭއެސް އިންބުނެ އެވެ.
މޯލްޑިވިއަންގެ ދުރު މަންޒިލްތަކަށް ދަތުރުތައް ފެށުމަށް ވައިޑް ބޮޑީ އެއާކްރާފްޓެއް ހޯދުމަސް ވެސް ވައިގެ އުޅަނދު ކުއްޔަށް ދޭ ބައިނަލްއަގުވާމީ ކުންފުނި ޓްރޫނޯޑްއާ އެކު ވެސް ވަނީ މިފަހުން ސޮއިކޮށްފަ އެވެ. އެ ކުންފުންޏާ އެކު ސޮއިކުރީ އެއާބަސް އޭ330 މަރުކާގެ ބޯޓެއް ގެނައުމަށެވެ.
