އިއުލާނުގައިވާ ގޮތުން މިއީ އެއް އަހަރު ދުވަހުގެ މަގާމެކެވެ. މުސާރައިގެ ގޮތުގައި 40،500ރ. ކަނޑައަޅާފައި ވާއިރު، މަސައްކަތާއި ގުޅޭ ގޮތުން ދެވޭ އެހެނިހެން އެލަވަންސާއި ރޯދަ އެލަވަންސް އަދި ޕެންޝަނާ ބެހޭ ގާނޫނުގެ ދަށުން ލިބިދެވޭ ޕެންޝަން ކޮންޓްރިބިއުޝަން ލިބޭނެ ކަމަށް އިއުލާނުގައިވެ އެވެ.
މި މަގާމަށް ކުރިމަތިލާ މީހުންގެ ޝަރުތުތަކުގެ ތެރޭގައި ގާނޫނީ ދާއިރާއިން ފުރަތަމަ ޑިގްރީ ހާސިލުކޮށްފައިވުމާ އެކު، ގާނޫނީ ވަކީލެއްގެ ގޮތުގައި ހަތް އަހަރު ދުވަހު މަސައްކަތްކޮށްފައި ވުން ހިމެނެ އެވެ.
ގާނޫނީ ދާއިރާގައި ކޮށްފައިވާ މަސައްކަތުގެ ތެރޭގައި އެމީހެއްގެ ނަޒާހަތްތެރިކަމާ މެދު ސުވާލު އުފެދޭ ފަދަ މައްސަލައެއް ކޯޓަކަށް ނުވަތަ ބާ ކައުންސިލަށް ސާބިތުވެފައިވާ މީހަކަށް ވެގެން ނުވާނެ އެވެ.
މީގެ އިތުރުން ބަނގުރޫޓުވެފައިވާ މީހެއްކަމުގައި ނުވުން ނުވަތަ ޖިނާޔަތުގެ ކުށެއް ސާބިތުވެފައިވާ މީހެއް ކަމުގައި ނުވުން ވެސް ޝަރުތުތަކުގެ ތެެރޭގައި ހިމެނެ އެވެ.
އިއުލާނުގައި ބުނެފައިވާ ގޮތުގައި، ކުރިން އެސްޖީއަކު ހޯދަން މީގެކުރިން ކުރި އިއުލާނަށް ފޯމު ހުށަހެޅި ފަރާތްތަކަށް މިފަހަރު ފޯމު ހުށަހަޅާކަށް ނުޖެހޭނެއެވެ.
މި އިއުލާނުގެ މުއްދަތު ހަމަވަނީ މި މަހުގެ 26 ވަނަ ދުވަހުގެ މެންދުރު 12:00 އަށެވެ.
2019 ވަނަ އަހަރު ވުޖޫދުވި، ބާ ކައުންސިލް މިހާރު އެކުލެވިގެން ވަނީ ވަކީލުން އިންތިހާބު ކުރާ ކައުންސިލްގެ ރައީސް، ނައިބު ރައީސްގެ އިތުރުން ހިންގާ ކޮމިޓީއަށް އިންތިހާބުކުރާ ހަ މެންބަރުންނާއި ބަންޑާރަ ނައިބެވެ.
ބާ ކައުންސިލް ވުޖޫދު ކުރުމުގެ ކުރިން ވަކީލުންގެ ކަންކަން ބަލަހައްޓަމުން ގެެންދިޔައީ ސުޕްރީމް ކޯޓުންނެވެ. އަދި ބަންޑާރަ ނައިބުގެ އޮފީހުން ވެސް ވަކީލުން ރެގިއުލޭޓް ކުރި ދުވަސްވަރެއް ވެސް ދިޔަ އެވެ.
