އައްޑޫގައި ހަށި ވިއްކުމުގެ މައްސަލައާ ގުޅިގެން ހައްޔަރު ކުރި ދެ އަންހެނުންނަކީ ތައިލެންޑް ދެ މީހުންނެވެ. އެއީ އުމުރުން 35 އަހަރުގެ މީހަކާ، 37 އަހަރުގެ މީހެއް ކަމަށްވަނީ މައުލޫމާތު ލިބިފައެވެ. މި ދެ މީހުންގެ މައްސަލަ އަނބުރާ ގެންދަން ޕީޖީން އެދިފައިވަނީ މިދިޔަ މަހު ފަހުކޮޅުއެވެ. އެހެންނަމަވެސް މައްސަލަ އަނބުރާ ގެންދަން ޕީޖީން އެދުނު ސަބަބެއް ސާފެއް ނުވެއެވެ.
މި ދެ މީހުންގެ މައްސަލަ އަނބުރާ ގެންދަން ޕީޖީން އެދުމުން އެ ދެ މީހުންގެ މައްސަލަ ކޯޓުން އަނބުރާ ފޮނުވާލާފައިވާއިރު، ދެ މީހުން ބަންދުންވެސްވަނީ ދޫކޮށްލާފައެވެ.
އައްޑޫގައި ހަށި ވިއްކުމާއި، ބަދުއަހުލާގީ އަމަލު ހިންގައި އެ ފަދަ ކަންކަމަށް މަގުފަހި ކުރާ ކަމަށް ތުހުމަތު ކުރެވޭ ޑޮކްޓަރަކުވެސް މި އަހަރުގެ ކުރީކޮޅު ހައްޔަރު ކުރިއެވެ. ކޯޓު އަމުރަކާއެކު ފުލުހުން އައްޑޫ ގެސްޓްހައުސްއެއް ރެއިޑްކޮށް، އޭރު ހައްޔަރު ކުރި މީހުންގެ ތެރޭގައި އައްޑޫ އީކުއެޓޯރިއަލް ހޮސްޕިޓަލުގައި މަސައްކަތް ކުރާ ބިދޭސީ ފިރިހެން ޑޮކްޓަރަކު ހިމެނެއެވެ. އޭނާ ހައްޔަރުކުރީ ބަރަހަނާ ހާލުގައި ހުއްޓާ ކަމަށް މައުލޫމާތު ލިބިފައިވެ އެވެ.
