ސިޓީތަކާއި ބެހޭ މިނިސްޓްރީން ބުނީ މީހުން ދިރިނުއުޅޭތާ ގިނަދުވަސްވެ ބޮލަށް ވެއްޓޭ ވަރުވެފައިހުރި ރަބީއުވިލާ ތަޅާލުމުގެ މަސައްކަތް ކުރަމުން އަންނަނީ އެ މިނިސްޓްރީގެ ޕަބްލިކް ވާކްސް ޔުނިޓުންކަމަށެވެ.
އަދި މި ގެ ތަޅައިލަން ސަރުކާރުން ނިންމީ ވީރާނާވުމުގެ ސަބަބުން އާންމު ރައްޔިތުންގެ ސަލާމަތަށް ނުރައްކާވާ ހިސާބަށް ދިޔުމުންކަމަށްވެސް އެ މިނިސްޓްރީން ބުނެއެވެ.
މއ. ރަބީއުވިލާގައި މީހުން ނޫޅޭތީ އެގެ ވަނީ ކުށްކުރާ ހާއްޔަކަށްވެފައިކަމަށް އެ ހިސާބު މީހުން ބުނެއެވެ. އެގޮތުން މަސްތުވާތަކެތި ބޭނުން ކުރުން އެގޭގެ ތެރޭގައި އާއްމުވެފައިވާކަމަށް އެ ހިސާބު އަވައްޓެރިން ވަނީ ބުނެފައެވެ.
މި އަހަރުގެ އޭޕްރީލް މަހުގެ 10ވަނަ ދުވަހުގެ ރޭ ރަބީއުވިލާގޭގައި ވަނީ އަލިފާނުގެ ހާދިސާއެއް ހިނގާފައެވެ. އެ ހާދިސާގައި އެއްވެސް މީހަކަށް އަނިޔާއެއް ނުވެއެވެ. އެހެންނަމަވެސް ހޫނުގެ އަސަރުކޮށް އިމާރާތްވަނީ އިތުރަށް ހަލާކުވެފައެވެ.
އޭގެ މަހެއްހާ ދުވަސްފަހުން، މޭ މަހުގެ 20ވަނަ ދުވަހު ގެއްލިގެން ހޯދަމުން ދިޔަ ޒުވާނަކު އެގޭގެ ތެރޭގައި މަރުވެފައި އޮއްވާ ވަނީ ފެނިފައެވެ.
މާލޭގައި ބާވެ ބޮލަށް ވެއްޓޭވަރު ތަޅާލަން ޖެހޭ 15 ވަރަކަށް އިމާރާތްހުރިކަމަށް ކަމާއި ގުޅޭ އިދާރާތަކުން ވަނީ ބުނެފައެވެ. ރައީސް ޑރ. މުއިއްޒު މާލޭ ސިޓީގެ ކައުންސިލްގެ މެމްބަރުންނާއި ބައްދަކުކުރެއްވި ދުވަހު މާލޭ މޭޔަރު އާދަމް އާޒިމްވަނި މި ގޮތަށް ހުރި އިމާރާތްތައް ތަޅާލުމަށް ދާ ހަރަދު ހަމަޖެހޭނެ އިންތިޒާމު ހަމަޖައްސާ ދިނުމަށް ރައީސް އަރިހުން އެދިވަޑައިގެންފައެވެ.
