ހައްޖާއި އުމްރާއަށް ދާ ގިނަ ބަޔަކު ޒިޔާރަތްކުރާ އެއްތަނަކީ "ޖަބަލުއް ނޫރޫ" އެވެ. ގިނަ ބައެއްގެ މެދުގައި އެތަން މަޝްހޫރީ "ހިރާ" ފަރުބަދައިގެ ގޮތުގައެވެ. ސަބަބަކީ އެ ފަރުބަދައިގައި "ހިރާ" ހޮހޮޅަ ހުންނާތީ އެވެ.
ހިރާ ފަރުބަދައިގެ ހޮހޮޅައަކީ މުސްލިމުންނަށް ވަރަށް ހާއްސަ ތަނެކެވެ. ސަބަބަކީ އަހަރުމެންގެ ނަބިއްޔާ މުހައްމަދު ރަސޫލާ ﷺ އަށް ކީރިތި ޤްރުއާނުގެ ފުރަތަމަ އާޔަތް ނުވަތަ ފުރަތަމަ ފަހަރަށް ވަހީ ބާއްވަވައިލެއްވެވީ ހިރާ ފަރުބަދައިގެ ހޮހޮޅައިގައި އިންނަވަނިކޮށެވެ.
ހިރާ ފަރުބަދައިގެ އުސްމިނަކީ 642 މީޓަރު (2106 ފޫޓު) އެވެ. ކީރިތި ރަސޫލާ އިންނެވި ހޮހޮޅަ ހުންނަނީ މި ފަރުބަދައިގެ އެންމެ މައްޗަށް ވުރެ ގާތްގަނޑަކަށް ވިއްސަކަށް ފޫޓް ތިރީގައެވެ. އެހެންނަމަވެސް ހައްޖާއި އުމްރާއަށްދާ ގިނަ ބަޔަކު މި ފަރުބަދަށް އަރާ ރަސޫލާ ﷺ އިންނެވި ހޮހޮޅަ ބަލާލުމުގެ އުފާ ލިބިގަނެެއެވެ.
ހިރާ ފަރުބަދަ މަތީގައި ބަޔަކު މަޑުކޮށްލައިގެން
ސައުދީ ސަރުކާރުން މި ވަނީ ހިރާ ފަރުބަދަށް އެރުމަށް ކޭބަލް ކާރު އެޅުމުގެ މަސައްކަތް ކުރާކަން ހާމަކޮށްފައެވެ. ހަރަމްގެ ހަބަރުތައް ގެނެސްދޭ ހަރަމައިން އިން ބުނީ ހިރާ ފަރުބަދައަށް ޒިޔާރަތްކުރާ މީހުން އެތަނަށް އެރުމަށް ކޭބަލް ކާރުގެ ހިދުމަތް ވަރަށް އަބަހަށް ތައާރަފުކުރާނެކަމަށެވެ. އޭރު ފަސޭހަކަމާއި ރައްކާތެރިކަމާއި އެކު ހިރާ ހޮހޮޅަ ބަލާން ޒިޔާރަތްކުރާ މީހުންނަށް އެތަނަށް ދެވޭނެކަމަށް ހަރަމައިން އިން ބުނެ އެވެ.
މި މަސައްކަތް ކުރަމުން އަންނަ ކުންފުނިން ބުނީ ކޭބަލް ކާރުގެ ހިދުމަތް އަންނަ އަހަރު ފެށޭނެކަމަށެވެ. އަދި އެކަމަށް ބޭނުންވާ ފަހުގެ ތައްޔާރީތައް ވަމުން އަންނަކަމަށް އެ ކުންފުނިން ވަނީ ބުނެފަ އެވެ.
