މީރާއިން ނެރުނު ބަޔާނެއްގައި ބުނީ "މައި ކެމިސްޓް" ގެ ވެރިޔާ ހުސެއިން އިރުފާން، ގަސްދުގައި ޓެކްސް އަށް ގަސްތުގައި ޓެކުހަށް މަކަރުހެދިކަމަށް ތުހުމަތުކުރެވޭތީ، ޖިނާއީ މައްސަލައެއްގެ ގޮތުގައި އެ މައްސަލަ އެ އިދާރާއިން ތަހުގީގުކޮށްފައިވާ ކަަމަށެވެ.
ހުސެއިން އިރުފާން ހޯލްސޭލް ވިޔަފާރިކަމުގައިވާ "މައި ކެމިސްޓް ގޯޑައުން" އާ ގުޅޭ އާމްދަނީ އެއްވެސް ވަރަކަށް އެ ފަރާތުން 2018، 2019 އަދި 2020 ވަނަ އަހަރަށް ހުށަހަޅާފައިވާ ޓެކްސް ބަޔާންތަކުގައި ހިމަނާފައިނުވާކަން ތަހުގީގަށް ފާހަގަވެފައިވާކަމަށް މީރާގެ ބަޔާނުގައިވެއެވެ. އަދި އެކަން ކޮށްފައިވަނީ ޓެކްސް ދެއްކުމުން ގަސްދުގައި އެއްކިބާވުމުގެ ނިޔަތުގައި ކަމަށް މީރާގެ ބަޔާނުގައިވެއެވެ.
އޭނާ އެވްރެޖްކޮށް އަހަރަކު 53 މިލިއަން ރުފިޔާގެ އާމްދަނީ މީރާއަށް ރިޕޯޓުކޮށްފައިނުވާ ކަމަށާއި ޖުމްލަ 12 މިލިއަނަށް ވުރެ ގިނަ ރުފިޔާ ޓެކްސްގެ ގޮތުގައި އިތުރަށް ދައްކަން ޖެހޭކަން އޮޑިޓުން އެނގޭ ކަމަށްވެސް މިރާގެ ބަޔާނުގައިވެއެވެ. އަދި އެ ފައިސާ ދައްކަން ހުސެއިން އިރުފާންއަށް އަންގާފައިވާކަމަށްވެސް މީރާއިން ބުނެއެވެ.
ޓެކްސް ނެގުމާ ބެހޭ އިދާރީ ގާނޫނުގެ 64 ވަނަ މާއްދާގެ ދަށުން ދައްކަންޖެހޭ ޓެކްސް ދެއްކުމަށް އެނގިހުރެ، ގަސްތުގައި އެއްކިބާވުމުގެ ނިޔަތުގައި އެއްވެސް ކަމެއް ކުރުމަކީ ކުށެކެވެ. އަދި އެފަދަ ކުށެއް ކުރުމަށް ޓެކްސް ދައްކަންޖެހޭ މީހަކަށް އެހީތެރިވެދިނުމުގެ ނިޔަތުގައި އެއްވެސް ކަމެއް ކުރުމަކީވެސް ކުށެކެވެ.
މީރާއިން ބުނީ ޓެކުހާ ގުޅުންހުރި ކުށްތައް ކުރަމުންދާ ފަރާތްތައް ދެނެގަނެ އެކަށީގެންވާ ފިޔަވަޅު އެޅުމަށްޓަކައި މީރާއިން ޖިނާއީ ތަހުގީގުތައް ކުރަމުން ގެންދާ ކަމަށެވެ.
