އެ ދިރާސާ ހަދަން ހަވާލު ކުރީ ނޯވޭގެ ކުންފުންޏެއް ކަމަށްވާ ފްލޯޝަންއާ އެވެ. ސަރުކާރުގެ ފަރާތުން އެ އެއްބަސްވުމުގައި ސޮއި ކުރީ ފްލޯޝަން އެވެ. އެ ކުންފުންޏަކީ ފެން އުފައްދާ ނިޒާމު ކަނޑު އަޑީގައި އިންސްޓޯލް ކޮށްދޭ ކުންފުންޏެވެ.
އެމްޑަބްލިއެސްސީން ބުނީ، މި ދިރާސާގައި ކަނޑު އަޑީގައި އާރްއޯ ޑީސެލިނޭޝަން ސިސްޓަމް ގާއިމްކުރުމަށް ބޭނުންވާ ފަންނީ މަޢުލޫމާތު ހޯދައި އެކަމަށް ބޭނުންވާ ދިރާސާތަކާއި، ތިމާވެއްޓަށް އަސަރުކުރާނެ މިންވަރު ދެނެގަތުމުގެ އިތުރުން ފެންއުފެއްދުމާ ގުޅޭ މާލީ ހިސާބުތައް ތައްޔާރުކުރުމަށް ހަމަޖެހިފައިވާ ކަމަށެވެ.
އެގޮތުން، މި ދިރާސާގައި އެމްޑަބްލިޔުއެސްސީގެ މައިގަނޑު ދައުރަކަށްވާނީ މިކަމާ ގުޅުވައި މިހާރަށް ލިބެންހުރި މައޫލޫމާތާއި ފަންނީ ލިޔެކިޔުންތައް ފޯރުކޮށްދިނުން ކަމަށެވެ. ސަރުކާރުގެ ވުޒާރާތަކާއި އެހެނިހެން އިދާރާތަކުން ބޭނުންވާ ހުއްދަތައް ހޯދުމަށް އެހީތެރިވުމާއި ރާއްޖޭގައި މި ދިރާސާ ކުރިޔަށް ގެންދިޔުމަށް ބޭނުންވާ އެހީތެރިކަން އެ ކުންފުނިން ފޯރުކޮށްދޭނެ ކަމަށް ވަނީ ބުނެފައިވެ އެވެ.
ރަސްމިއްޔާތުގައި ވާހަކަދައްކަވަމުން އެމްޑަބްލިޔުއެސްސީގެ މެނޭޖިން ޑިރެކްޓަރު އަބްދުލް މަތީން މުހައްމަދު ވިދާޅުވީ މާލެ ސަރަހައްދަށް ބޭނުންވާ މީރު ފެން އުފެންދުމުގެ ނިޒާމެއް ކަނޑު އަޑީގައި ގާއިމްކުރެވުމާއެކު ގިނަ ފައިދާތަކެއް ލިބޭނެ ކަމަށެވެ. އެގޮތުން ފެން ޕްލާންޓް ގާއިމްކުރުމަށް ބިމެއް ބޭނުން ނުވުމުގެ އިތުރުން މިހާރަށްވުރެ ހަރަދު ކުޑަކޮށް، ކަނޑު އަޑީގައި ފެން އުފައްދާ ނިޒާމެއް އޮޕަރޭޓުކުރެވިދާނެކަން މަތީން ފާހަގަކުރެއްވި އެވެ.
މީގެއިތުރުން، އެމްޑަބްލިއުއެސްސީން ބުނީ މި ދިރާސާގެ އަލީގައި ކަނޑު އަޑީގައި ފެން އުފްއްދާ ނިޒާމެއް ގާއިމުކުރެވިއްޖެނަމަ ފެނުގެ ޑިމާންޑާއި އެއްވަރަށް ފެން އުފައްދާ، ރައްކާ ކުރެވޭ ނިޒާމުގެ ގާބިލުކަން އިތުރުކުރެވޭނެ ކަމަށެވެ. އަދި، ދިރާސާގެ ތެރެއިން އާ އީޖާދީ ހޯދުންތައް ހޯދޭނެ ކަން ވެސް އެކުންފުނިން ވަނީ ފާހަގަކޮށްފަ އެވެ.
