އެޗްޑީސީން ބުނީ މި ހޮޓާތައް ތަރައްގީކުރާނީ ހުޅުމާލޭ ދެވަނަ ފިޔަވަހީގެ އިންޓަގްރޭޓެޑް ޓޫރިޒަމް ޒޯން، އާބަން އައިލްގައިކަމަށެވެ.
އެޗްޑީސީން ބުނީ މި މަޝްރޫއު ދޫކުރުމުގައި އިސްކަންދޭނީ ލޭންޑް ލީސް މޮޑެލްއަށްކަމަށެވެ. އެހެންނަމަވެސް، ޝައުގުވެރިވާ ފަރާތްތަކަށް އެހެން މޮޑެލްތަކަށް ވެސް ހުށަހެޅިދާނެކަމަށްވެސް އެޗްޑީސީން ބުނެެ އެވެ.
އެއް ފަރާތަށްވުރެ ގިނަ ފަރާތުން އެ މަޝްރޫއުތަކަށް ޝައުގުވެރިކަން ފާޅުކޮށް ޕްރޮޕޯސަލް ހުށަހަޅައިފިނަމަ މަޝްރޫއު ހަވާލު ކުރާނީ އެންމެ ފުރިހަމަ ޕްރޮޕޯސަލް ހުށަހަޅާ ފަރާތަކަށްކަމަށް އެޗްޑީސީން ބުނެ އެވެ.
ހުށައެޅުންތައް އިވެލުއޭޓް ކުރުމުގައި ބަލާނެ ކަންތައްތަކުގެ ތެރޭގައި ހުށައަޅާފައިވާ ބިޒްނަސް މޮޑަލްއާއި، އޮޕަރޭޓަރުގެ އެކްސްޕީރިއެންސް އަދި ސީއެސްއާރު ހިމެނޭކަމަށް އެޗްޑީސީން ބުނެ އެވެ.
އާބަން އައިލްގައި ބުޓީކް ހޮޓެލް ތަރައްގީކޮށް ހިންގަން ޝައުގުވެރިވާ ފަރާތްތަކަށް އެ ފުރުސަތު ހުޅުވާލާފައިވަނީ އަންނަ މަހުގެ 1 ވަނަދުވަހުގެ 14:00ގެ ނިޔަލަށެވެ. ހުށައެޅުންތައް ހުށައަޅާނީ [email protected] އީމެއިލް މެދުވެރިކޮށްކަމަށް އެޗްޑީސީން ބުނެއެވެ. މި މަޝްރޫއާ ގުޅޭ އިތުރު މައުލޫމާތު އެޗްޑީސީގެ ވެބްސައިޓުން https://www.hdc.mv/announcements/ ލިބެން ހުންނާކަމަށްވެސް އެ ކޯޕަރޭޝަނުން ބުނެ އެވެ.
މިދިޔަ ސަރުކާރުގެ ދުވަސްވަރު އާބަންކޯއިން އިއުލާންކުރި 'އާބަން އައިލް' އަކީ ހުޅުމާލޭގެ އެންމެ އުތުރުން އޮންނަ ފަތުރުވެރިކަމަށް ހާއްސަ ކުރެވިފައިވާ ސަރަހައްދެކެވެ. ގާތްގަނޑަކަށް 23 ހެކްޓަރުގެ އެ ސަރަހައްދުގައި ފަތުރުވެރިންނަށް ހާއްސަ ތަފާތު ގިނަ އެކޮމަޑޭޝަން ފެސިލިޓީތައް ހިމެނޭނެކަމަށް އެޗްޑިސީން ބުނެ އެވެ.
ޗުއްޓީ ހޭދަކުރުމަށް އަންނަ ފަތުރުވެރިންނަށާއި ކުރު މުއްދަތަކަށް ނުވަތަ ޓްރާންސިޓްކޮށް މަޑުކުރާ ފަތުރުވެރިންނަށާއި ވިޔަފާރި ބޭނުންތަކުގައި އަންނަ ފަތުރުވެރިންގެ އިތުރުން ޑިޖިޓަލް ނޮމެޑްސް ފަދަ ދިގު މުއްދަތަކަށް މަޑުކުރަން ބޭނުންވާ ފަރާތްތަކަށް ބޭނުންވާ ފަދަ އެކޮމަޑޭޝަންތައް "އާބަން އައިލް" ގައި ހިމެނޭނެ ކަމަށް އެޗްޑީސީން ވަނީ ބުނެފަ އެވެ.
