Advertisement

ކަސޯޓީ ޒިންދަގީ ކޭ އަކީ ގިނަ ބައެއްގެ މަގުބޫލުކަން ހޯދާފައިވާ ޝޯއެކެވެ. އެކްތާ ކަޕޫރުގެ އެންމެ މަގްބޫލު އެއް ޑްރާމާ ކަމަށްވާ ކަސޯޓީ ޒިންދަގީ ކޭގެ ފުރަތަމަ ބައި ދައްކާފައިވަނީ 2001 ވަނަ އަހަރުއެވެ. އެ ޝޯއިގެ ލީޑު ރޯލު ކަމަށްވާ ޕްރެނާގެ ރޯލުން ފެނިގެންދިޔައީ ޝުވެތާ ތިވާރީއެވެ.

އެޝޯ 2008 ވަނަ އަހަރު ދެއްކުން ހުއްޓާލާފައިވާއިރު ޝޯގެ ދެވަނަ ބައެއް ފެށީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ. އެގޮތުން ޝޯގެ ދެވަނަ ބަޔަށް ޕްރެނާގެ ރޯލުން ފެނިގެންދިޔައީ އެރިކާ ފެނާންޑެޒްއެވެ.

ޝޯ ފެށުމާއެކު ގިނަ ބައެއްގެ ހިތުގައި ސުވާލު އުފެދުނީ އެރިކާއަށް އެރޯލު ރަނގަޅަށް ކުޅެވޭނެ ތޯއެވެ. ސަބަބަކީ ޝްވެތާ ވަނީ ޕްރެނާގެ ރޯލު ވަރަށް ފުރިހަމައަށް ފުރަތަމަ ސީޒަންގައި ކުޅެފައެވެ.

ދެވަނަ ސީޒަން ފެށުމާއެކު ގިނަ ބަޔަކު ބުނަން ފެށީ އެރިކާ ވެސް ޝްވެތާ ހާ މޮޅު ކަމަށެވެ. އެގޮތުން އެރިކާ ވެސް އެރޯލު ވަރަށް ފުރިހަމައަށް ކުޅެމުންދާ ކަމަށް ގިނަ ބަޔަކު ބުނެއެވެ. އަދި ޝްވެތާ އާއި އެރިކާ އާ އަޅާ ކިޔަން ބޭނުން ނުވާ ކަމަށާއި އެދެމީހުން ވެސް އެރޯލަށް ވަރަށް ފުރިހަމަ ކަމަށް ގިނަ ބަޔަކު ބުނެއެވެ.

އުމުރުން 26 އަހަރުގެ އެރިކާ އެންމެ ފަހުން ފެނިގެން ދިޔައީ ސޮނީ އެންޓަޓެއިންމެންޓް އިން ދެއްކި 'ކުޗް ރަންގް ޕިޔާރް ކޭ އޭސޭ ބީ' އިންނެވެ.

އުމުރުން 39 އަހަރުގެ ޝްވެތާ ވަނީ ކަލާސް ޓީވީ އިން ދައްކަމުން އަންނަ މަޝްހޫރު ރިއަލިޓީ ޝޯ "ބިގް ބޮސް" ގެ ހަތަރު ވަނަ ސީޒަން ކާމިޔާބުކޮށްފައެވެ.