މި އެއްބަސްވުމުގައި ސްޓެލްކޯގެ ފަރާތުން ސޮއިކުރެއްވީ ކުންފުނީގެ މެނޭޖިންގ ޑިރެކްޓަރ ހުސައިން ފަހުމީ އެވެ. އަދި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ފަރާތުން ސޮއިކުރެއްވީ އެ އޮތޯރިޓީގެ ޗީފް އެގްޒެކެޓިވް ހިސާން ހަސަނެވެ.
ސްޓެލްކޯއިން ބުނީ، މި އެއްބަސްވުމުގެ ދަށުން އެ ކުންފުނީގެ މަސައްކަތްތައް ހިންގުމަށް މިހާރު ރާވާފައިވާ ނިޒާމުތަކުގައި ހުރި ނިޒާމީ ހިރާސްތައް ދެނެގަތުމަށް އެންޑީއެމްއޭއިން އެހީވާނެ ކަމަށާއި، އެ ކުންފުނީގައި މިހާރު އެކުލަވާލާފައިވާ ކްރައިސިސް މެނޭޖްމަންޓްގެ އޮނިގަނޑުތައް ދިރާސާކުރާނެ ކަމަށެވެ.
ސްޓެލްކޯއަށް އާ ކްރައިސިސް މެނޭޖްމަންޓް ޕްލޭނެއް ގާއިމް ކުރާއިރު، ނުރައްކާތަކާއި ގުޅިގެން އަމަލުކުރާނެ ގޮތާއި ކުންފުނީގެ އެތެރޭގައި ބޭނުންކުރާނެ ކްރައިސިސް މެނޭޖްމަންޓް ފުރޭމްވޯކްއެއް އެކުލަވާލެވޭނެ ކަމަށްވެސް ސްޓެލްކޯއިންބުނެ އެވެ.
މީގެ އިތުރުން، ކުންފުނީގައި ކޮމްޕެނީ އެމަރޖެންސީ ރެސްޕޮންސް ޓީމެއް ގާއިމްކޮށް، މި މަސައްކަތަށް ސްޓެލްކޯގެ މުވައްޒަފުންގެ ތެރެއިން ޓީމެއް ތަމްރީނުކުރުމުގައި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން އެހީވާ ގޮތަށްވެސް އެއްބަސްވެފައިވެ އެވެ.
މި ރަސްމިއްޔާތުގައި ވާހަކަފުޅުދައްކަވަމުން ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވީ، އެ ކުންފުންޏަކީ އަބަދުވެސް ގައުމީ ކާރިސާތަކުގަ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީއާ އަދި ސަރުކާރުގެ ކަމާބެހޭ މުއައްސަސާތަކާ ގުޅިގެން މަސައްކަތްކުރާ ކުންފުންޏެއް ކަމަށެވެ.
ރާއްޖެއަށް މިހާރު ކުރަމުންދާ ވިއްސާރައިގައި މާލޭގެ ގިނަ ގެތަކަކަށް ވަނީ ގެއްލުން ލިބިފައެވެ. އަދި އުތުރުގެ ރަށްތަކަށް ވެސް މިވިއްސާރައިގައި ގެއްލުން ލިބިފައި ވާކަމަށް އެމްޑީއެމްއޭއިން ބުންޏެވެ.
