ފައްޔާޒު މިހެން ވިދާޅުވީ މިރޭ އޮތް އެމްޑީޕީގެ ގައުމީ މަޖިލީހުގެ ޖަލްސާގައި ވާހަކަ ދައްކަވަމުންނެވެ.
ފައްޔާޒު ވިދާޅުވީ މިސަރުކާރުން މަސައްކަތް ކުރަމުންދަނީ މުޅި ލާމަރުކަޒީ ނިޒާމު ފުޑުފުޑު ކޮށްލުމަށް ކަމަށާއި، އެމަންޒަރު މިހާރު ފެންނަމުންދާ ކަމަށެވެ.
އޭނާ ވިދާޅުވި ގޮތުގައި އާބަން ޑިވެލޮޕްމަންޓްގެ ނަމުގައި މަޖިލީހަށް ހުށަހަޅާފައިވާ ބިލުގައި ހިމަނާފައި އޮތް މާއްދާއެއްގެ ސަބަބުން، ކައުންސިލަރުންނަށް ދެވިފައިވާ އިގްތިޞާދީ އަދި މާލީ ބާރުވެރިކަން އެއްކޮށް ނިގުޅައިގަތުމުގެ ފުރުސަތު ސަރުކާރަށް ލިބެއެވެ.
މީގެ އިތުރުން ފައްޔާޒު ވިދާޅުވީ އެމްޑީޕީން އަބަދުވެސް މަސައްކަތް ކުރަނީ ޑިމޮކްރަސީ ކުރިއެރުވުމަށް ކަމަށެވެ. އެގޮތުން ފާއިތުވި 5 އަހަރު ލާމަރުކަޒީ ނިޒާމަށް ދިން ބާރުތައް ފައްޔާޒު ފާހަގަކުރެއްވި އެވެ. ނަމަވެސް އާބަން ޑިވެލޮޕްމަންޓް ނަމުގައި ހުށަހަޅާފައިވާ ބިލަކީ ޑިމޮކްރަސީއަށް ދޭ ނުރައްކާތެރި ހަމަލާއެއް ކަމަށް ފައްޔާޒު ވިދާޅުވި އެވެ.
އާބަން ޑިވެލޮޕްމަންޓު ބިލަށް އާންމުންގެ ޚިޔާލު ހޯދުމަށް މިހާރު ވަނީ ހުޅުވާލާފައެވެ. ސަރުކާރުން ހުށަހެޅި މި ބިލުގެ ސްޕޮންސަރަކީ ކޮލަމާފުށީ ދާއިރާގެ މެމްބަރު އިބްރާހީމް ދީދީއެވެ.
މި ބިލު ހުށަހެޅި ސަބަބުގެ ގޮތުގައި ބުނެފައިވަނީ، ރާއްޖޭގައި އާބަން ސަރަހައްދުތައް ކަނޑައެޅުމާއި އެފަދަ ސަރަހައްދު ތަރައްގީކުރުމާގުޅޭ ކަންކަން ހަރުދަނާ ގާނޫނީ އޮނިގަނޑެއްގެ ދަށުން އިންތިޒާމުކުރުމަށްޓަކައި، އާބަން ސަރަހައްދުތަކާއި އެފަދަ ސަރަހައްދުތަކުގެ ޒޯންތަކާއި ގިންތިތަކާއި ބިމުގެ ބޭނުން ކަނޑައެޅުމާއި އެފަދަ ސަރަހައްދުތައް ތަރައްގީކޮށް ހިންގުމުގެ އަސާސީ މިންގަނޑުތަކާއި އާބަން ސަރަހައްދުތަކުގައި ހިންގާ ތަރައްގީގެ މަޝްރޫއުތައް މޮނިޓާކޮށް ފިޔަވަޅުއެޅުމާބެހޭ އުސޫލުތައް ބަޔާން ކުރުން ކަމަށެވެ.
އާބަން ސަރަހައްދުތައް ކަނޑައެޅުމާއި އާބަން ސަރަހައްދުތައް ތަރައްގީކޮށް ހިންގުމާބެހޭ ގައުމީ ސިޔާސަތު ކަނޑައަޅާނީ ވަޒީރުންގެ މަޖިލީޙުގެ ލަފާގެ މަތިން ރައީސް ކަމަށް މިބިލުގައި ބުނެފައިވެ އެވެ. އަދި މި ސިޔާސަތު ކަނޑައަޅާ އާންމު ކުރަންވާނެ ކަމަށާއި، އަދި ސިޔާސަތު ތަންފީޒުކުރެތޯ ބެލުމުގެ ޒިންމާ އަދާކުރާނީ މިނިސްޓަރު ކަމަށް ވެސް ބަޔާންކޮށްފައިވެ އެވެ.
އެމްޑީޕީގެ ގައުމީ މަޖިލިސް ޖަލްސާގައި އެ ޕާޓީގެ ރައީސް އަބްދުﷲ ޝާހިދު ވެސް ވަނީ މި ބިލަށް ވަރަށް ބޮޑަށް ފާޑު ވިދާޅުވެފަ އެވެ.
ޝާހިދު ވިދާޅުވި ގޮތުގައި ރަށެއްގެ ތަރައްގީއަށް ކުރަންޖެހޭ ކަންކަން އެންމެ ރަނގަޅަށް އެނގޭނީ އެ ރަށެއްގައި ދިރިއުޅޭ ބަޔަކަށެވެ. އަދި އެ ކަމަށް މާލޭގައި ހުންނަވާ މިނިސްޓަރަކަށް ބަސް ވިދާޅުވެވިގެން ނުވާނެ ކަމަށް އޭނާ ވިދާޅުވި އެވެ.
ލާމަރުކަޒީ ގާނޫނުގެ ދަށުން ކައުންސިލްތަކަށް ބޮޑެތި ބާރުތަކެއް ދިނީ އެމްޑީޕީ ސަރުކާރުންކަން ފާހަގަކުރައްވާ ޝާހިދު ވިދާޅުވީ އެ ގޮތަށް އެމްޑީޕީ ސަރުކާރުން ނިންމީ، އެއީ ރާއްޖެ ހިންގުމަށް އެންމެ ރަނގަޅު ނިޒާމު ކަމަށް ގަބޫލު ކުރާތީ ކަމަށެވެ.
އަދި ވިދާޅުވީ އާބަން ޑިވަލޮޕްމަންޓުގެ ބިލަކީ "ކަތީބު" ސިސްޓަމަށް ރާއްޖެ ގެންދިއުމަށް މި ސަރުކާރުން ކުރާ މަސައްކަތެއްކަމަށެވެ.
