ދެން އޮންނަ އޭޝިއަން ގޭމްސް އޮންނާނީ ޖަޕާނުގައި 2026 ވަނަ އަހަރުއެވެ. މި ޖާގަ ރާއްޖެ އަށް ކަށަވަރުވީ، ތުލުސްދޫގައި މިހާރު ކުރިއަށްދާ އޭޝިއަން ސަރފިން ޗެމްޕިއަންޝިޕްގެ އަންހެން އޯޕަން ބައިގެ ހީޓުތަކުން ރާއްޖެއާ އެކު, ދެން ވާދަކުރި އިންޑިއާ އަދި ސްރީ ލަންކާގެ އެތުލީޓުން ވާދަކުރި ހީޓުތަކުގެ ފުލަށް ދިޔުމުންނެވެ. ބުދަ ދުވަހު އޮތް ހީޓުތަކުގެ ތެރެއިން ރާއްޖޭގެ އާޔާ ވާދަކުރީ ފުރަތަމަ ހީޓުގަ އެވެ. މި ހީޓުގައި ވާދަކޮށް އާޔާ ވަނީ ހީޓުގެ ތިން ވަނަ ހޯދައިފަ އެވެ. ތިން ވަނަ އާޔާ އަށް ލިބުނީ 4.20 ސްކޯ ކޮށްގެންނެވެ. މި ހީޓުގެ އެއް ވަނަ ހޯދީ ޖަޕާނުގެ އަންރީ މަޓްސްނޯ އެވެ. އޭނާ ވަނީ 13.17 ސްކޯ ކޮށްފަ އެވެ. ދެ ވަނަ އަށް ދިޔައީ، ވިއާ އެސްޓްރެލަންޑޯ އެވެ. އޭނާ ވަނީ 10.67 ސްކޯކޮށްފަ އެވެ.
ޖަޕާނުގައި 2026 ވަނަ އަހަރު އޮންނަ އޭޝިއަން ގޭމްސް އަކީ ސާފިން އިވެންޓް ހިމެނޭ ފުރަތަމަ އޭޝިއަން ގޭމްސް އެެވެ. އެ ތާރީހީ ގޭމްސް އަށް ރާއްޖެއިން ދާނެ އަންހެން ސާފަރަކު ނިންމާނީ ރާއްޖޭގެ ސާފިން އެސޯސިއޭޝަނުންނެވެ.
މި ގޮތަށް ފުރުސަތު ދެނީ އެ މުބާރާތަށް އަދި ދުވަސް އޮތުމާއި ގުޅިގެން ވަކި ސާފަރަކު ހޮވުމުން އެ އެތުލީޓު މުބާރާތުގެ ކުރިން އަނިޔާއެއް ދިމާވެ، މުބާރާތުގައި ބައިވެރިނުވެވިދާނެ ތީ އެވެ.
