ޕީޖީ ޝަމީމް މަގާމުން ވަކިކުރަން ހުށަހެޅީ ހުޅުދޫ ދާއިރާގެ މެންބަރު މުހައްމަދު ޝާހިދެވެ.
އެ މައްސަލައިގައި ޖަވާބުދާރީވާން މިއަދު ހެނދުނު ރައްޔިތުންގެ މަޖިލީހުގައި އެ މައްސަލަ ދިރާސާކުރާ ޖުޑިޝަރީ ކޮމިޓީއަށް ޝަމީމް ހާޒިރުކުރަން ވަނީ ނިންމައިފައެވެ. އެ ކޮމިޓީއަށް ވަޑައިގެންނެވުމުގެ ކުރީގައި ޕީޖީ އޮފީހުން ނެރުނު ބަޔާނެއްގައި ވަނީ އެ ކޮމިޓީ ލައިވްކޮށްދޭން ޕީޖީގެ ފަރާތުން އެދިފައިވާ ކަމަށް ވިދާޅުވެފަ އެވެެ.
"ކޮމިޓީގެ މި ޖަލްސާ ސިއްރު ނުކޮށް، ޢާންމުންނަށް ހުޅުވާލައިގެން ބާއްވަވައި ދެއްވުމަށް ޕްރޮސިކުޓަރ ޖެނެރަލް އެދިވަޑައިގަންނަވައެވެ،" ޕީޖީ އޮފީހުގެ ބަޔާނުގައިވެ އެވެ.
އެ ކޮމިޓީ ސިއްރު ކުރުމަށް ހުށަހެޅުއްވީ، ތުލުސްދޫ ދާއިރާގެ ޕީއެންސީ މެންބަރު އިބްރާހިމް ނަސީމެވެ. އަދި އެ ހުށަހެޅުމަށް ތާއީދު ކުރެއްވީ ފޭދޫ އުތުރު ދާއިރާގެ ޕީއެންސީ މެންބަރު އިސްމާއިލް ނިޒާރެވެ.
ކޮމިޓީ ސިއްރުކުރަން މެންބަރުން ހުށަހެޅުއްވި ސަބަބަކީ ޝަމީމްއާ މެދު ކުރެވޭ ތުހުމަތުތަކުގެ ތެރޭ ބައެއް މީހުންގެ ޒާތީ މައުލޫމާތުތައް ހިމެނޭ މައްސަލަތައް ހުރުމެވެ.
