ސިއްހީ ހިދުމަތް ދިނުމުގެ ގާނޫނަށް އިސްލާހު ގެނައުމުގެ ބިލު، އިޖުތިމާއީ ކޮމިޓީން ދިރާސާކޮށް ނިންމި ގޮތުގެ ރިޕޯޓަށް ބަހުސް ކުރައްވަމުން ސިޔާމް ވިދާޅުވީ މިދިޔަ 30 އަކަށް އަހަރުތެރޭ ސިއްހީ ދާއިރާ އެއްކޮށް ފެއިލްވެފައިވާ ކަމަށާއި މިހާރު ވެސް އޮތީ އެ ހާލަތުގައި ކަމަށެވެ.
އޭނާ ވިދާޅުވީ ރާއްޖޭގައި ބޮޑެތި ހޮސްޕިޓަލް ހުއްޓަސް އެ ތަންތަނުގެ އެކަށީގެންވާ ރަނގަޅު ބޭހެއް ނުހުންނަ ކަމަށެވެ. ސިޔާމް ވިދާޅުވި ގޮތުގައި އެންމެ އެކަށީގެންވާ ވަސީލަތްތަކެއްވެސް ހޮސްޕިޓަލުތަކުގައި ނުހުރެ އެވެ.
ސިޔާމް އެހެން ވިދާޅުވިއިރު، އޭނާގެ އެހީގައި ބ. ކަމަދޫގެ ހުރިހާ ރައްޔިތުންނަށް ހިލޭ ބޭސްފަރުވާ ކުރެވޭނެ ގޮތް މިފަހުން ވަނީ ހަމަޖައްސައިދެއްވާފަ އެވެ.
- އިތުރަށް ކިޔާލަން: މުޅި ކަމަދޫއަށް ސިޔާމްގެ ހަރަދުގައި ބޭސްފަރުވާ ހަމަޖައްސާދެނީ
އެ މަނިކުފާނު ވިދާޅުވީ އާސަންދަ ދެނީ ސިއްހީ ހިދުމަތް ރަނގަޅު ކުރުމުގެ ބޭނުމުގައި ކަމަށްވީ ނަމަވެސް އެ ހިދުމަތުން ފައިދާއެއް ނުލިބޭ ކަމަށެވެ. އެހެންވެ، މި ދާއިރާ ބިންގަލުން ފަށައިގެން ރަނގަޅު ކުރަން ޖެހިފައިވާ ކަމަށް ސިޔާމް ވިދާޅުވި އެވެ.
އާސަންދައަށް ކުރާ ހޭދަ އަހަރުން އަހަރަށް ދަނީ އިތުރުވަމުންނެވެ. އެންމެ ފަހުގެ ތަފާސްހިސާބުން ދައްކާ ގޮތުގައި މި އަހަރުގެ ދެވަނަ ކުއާޓަރު ނިމުނުއިރު އާސަންދަ ސްކީމަށް މި އަހަރަށް ބަޖެޓުކުރި 1.9 ބިލިއަން ރުފިޔާގެ ބޮޑުބައި ވަނީ ހުސްވެފަ އެވެ.
