ރާއްޖެއަށް އެތެކުރާ ކާބޯތަކެއްޗާއި ރާއްޖޭން ބޭރަށް ފޮނުވާ ކާބޯތަކެތީގެ ރައްކާތެރިކަމުގެ ފެންވަރު ރަނގަޅު ކުރުމުގެ އުސޫލުތައް ކަނޑައަޅައިފައިވާ ކާބޯތަކެތީގެ ރައްކާތެރިކަމުގެ ބިލު ރައީސް ޑރ މުހައްމަދު މުއިއްޒު ތަސްދީގުކުރެއްވީ މިއަހަރުގެ މެއި މަހުގެ 23 ވަނަ ދުވަހުއެވެ. މި ގާނޫނަށް މާދަމާއިން ފެށިގެން އަމަލުކުރަން ފަށާނެ އެވެ.
ހެލްތު މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން މިނިސްޓަރ ވިދާޅުވީ، ކާބޯތަކެތީގެ ރައްކާތެރިކަން ކަށަވަަރު ކުރުމުގެ ގާނޫނުގެ ދަށުން ކާބޯތަކެތީގެ ރައްކާތެރިކަން ކަށަވަރު ކުރަން ފަސޭހައިން ރިޕޯޓް ކުރެވޭނެ ނިޒާމެއް ގާއިމުކުރަން ޖެހޭ ކަމަށެވެ.
މިނިސްޓަރ ވިދާޅުވީ، މިކަމުގައި އާމުންގެ އެހީތެރިކަން ބޭނުންވާ ކަމަށާއި، ފުރުދީ ލެވެލުގައި މިކަމުގެ އެހީތެރިކަން ލިބޭވަރަކަށް ރައްޔިތުންނަށް އެހީތެރިކަން ފޯރުކޮށްދޭން ފަސޭހަވެގެންދާނެ ކަމަށެވެ.
މިކަމުގެ ސަބަބުން ސޯޝަލް މީޑިއާގައި ފޮޓޮ އާއި ވީޑިއޯ އާންމު ކުރުމުގެ ކުރިން އެކަން އެމްއެފްޑީއޭއާ ހިއްސާ ކުރުމުން ފިޔަވަޅު އަޅަން ފަސޭހަ ވެގެންދާނެ ކަމަށްވެސް މިނިސްޓަރު ވިދާޅުވި އެވެ.
އެމްއެފްޑީއޭ އަށް މައްސަލަތައް ރިޕޯޓު ކުރުމަށް މިހާރު ބޭނުން ކުރަނީ 7200321 ނަންބަރެވެ. މި ނަންބަރަށް ގުޅައިގެންނާއި ވަޓްއަޕް އަދި ވައިބާ މެދުވެރިކޮށް ޝަކުވާ ހުށަހެޅެ އެވެ.
