އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ، މިހާރު އެންމެ ބޮޑު ކަމަކަށް ދިމާވެފައި ވަނީ ކަންމަތީ ފިހާރައިގައި ހުންނަ ތަކެތި ޓްރެކް ކުރެވޭނެ ގޮތެއްނެތުން ކަމަށެވެ.
މިނިސްޓަރ ވިދާޅުވީ، އެފަދަ ތަކެތި ޕެކްކޮށްފައި ހުންނައިރު، އެއީ ކޮންތަނަކުން އުފައްދާފައި ހުންނަ އެއްޗެއްކަން އެނގެން ނުހުންނަ ކަމަށާއި، ކާބޯތަކެތީގެ ގާނޫނާ އެކު، ހާއްސަ ލޭބަލެއް ވިއްކާ ކޮންމެ އެއްޗެއްގައި ޖެހޭނެ ކަމަށެވެ.
ރަޖިސްޓާކޮށްގެން ކުރާ ވިޔަފާރިތަކުގައި ލައިސަންސް ދޫކުރަމުން އަންނަ ކަމަށް މިނިސްޓަރ ވިދާޅުވި އެވެ. އަދި "ހޯމް ބޭސްޑް" ތަކެތި އުފައްދާއިރު، އެކަމަށް ބަލާނެ ކަމަށާއި، މައްސަލަ ދިމާވަނީ "ހޯމް ބޭސްޑް" ކޮށް ތަކެތި އުފައްދާއިރު ކަަމަށެވެ.
މިނިސްޓަރ ވިދާޅުވީ، މާދަމައިން ފެށިގެން ކާބޯތަކެތީގެ ރައްކައުތެރިކަމުގެ ގާނޫނު ތަންފީޒުކުރެވިގެންދާނެ ކަމަށާއި، އެ ގާނޫނުގެ ދަށުން އެމްއެފްޑީއޭއަށްވެސް ހާއްސަ ބާރުތަކެއް ލިބިގެންދާނެ ކަމަށެވެ.
މިނިސްޓަރު ވަނީ ބައެއް ފަހަރަށް ގެތަކުގެ ކޮޓަރިތަކުގައި ކުރާ މިފަދަ ކަންކަމަކީ ބޭރަށް ފެންނަން ހުންނަ ކަންތައްތަކެއް ނޫން ކަމަށާއި އެކަންކަން އެނގެނީ ކޮންމެވެސް ފަރާތަކުން ކުރާ ރިޕޯޓަކުން ކަން ފާހަގަކުރައްވާފަ އެވެ.
ފާހަގަކޮށްލެވޭ ގޮތުގައި މިދިޔަ އާދިއްތަ ދުވަހު ވަނީ ބަންގްލަދޭޝްގެ 32 އަހަރުގެ، އެމްޑީ އަރަފާތު ހޮސައިން ކިޔާ މީހަކު ބުޅާ މަރައި، އޭގެ މަހުން ކައްކައިފައިވާ ކާތަކެތި ވިއްކާކަމުގެ މައްސަލައެއް ފެންމަތިވެފަ އެވެ.
އެ މީހާއާ ގުޅޭ މައުލޫމާތު އާންމުވުމާއެކު އާންމުންގެ ގިނަ ބަޔަކު ވަނީ އެ ކަމާ ނުރުހުން ފާޅުކޮށްފައެވެ. އެގޮތުން، އޭނާ ކާބޯތަކެތި ވިއްކީ ކޮން ތަނެއްގައިތޯ، ކިހާ ދުވަހަކުތޯއާއި ހުރިހާ މައުލޫމާތެއް ކަމާ ގުޅުންހުރި އިދާރާތަކުން ހާމަކުރަން ގިނަ ބަޔަކު ވަނީ ގޮވާލައިފަ އެވެ.
މިނިސްޓަރު އިތުރަށް ވިދާޅުވީ، އިންޓަވަލް އަށް ހަދާ ތަކެތި ބުޅާ މަސް އަޅައިގެން ހަދާފައި ހުރި ކަމުގެ ރިޕޯޓެއް އެ ވުޒާރާއަށް އައިސްފައި ނުވާ ކަމަށާއި، އެކަން ކަށަވަރުވެސް ނުވާ ކަމަށެވެ.
އެހެންނަމަވެސް އެ މައްސަލަ މިހާރު ތަހުގީގުކުރަމުންދާއިރު، ތަހުގީގުކުރާ އިދާރާތަކާ ގުޅިގެން ވަރަށް ކައިރިން އެކަން ބަލަމުންދާ ކަމަށް ވެސް ހަލީލް ވިދާޅުވި އެވެ.
އަދި ތަހުގީގަށްފަހު، އެ މައުލޫމާތު އާއްމު ކުރާނެ ކަމަށްވެސް ވިދާޅުވި އެވެ.
