މިނިސްޓަރު ޒަމީރު "އެކްސް"ގައި ކުރެއްވި ޕޯސްޓެއްގައި ވިދާޅުވީ މި ބައްދަލުވުމުގައި ރާއްޖޭގައި މިހާރު ހިނގަމުންދާ އަދި ކުރިއަށް އޮތްތަނުގައި ހިންގުމަށް ރާވާފައިވާ ޕްރޮޖެކްޓުތަކުގެ މައުލޫމާތު އެރުވި ކަމަށާއި އަދި ރާއްޖެ އަށް އެހީތެރިކަން ބޭނުންވާ އިތުރު ދާއިރާތަކާއި ގުޅޭގޮތުން ވެސް މަޝްވަރާތައް ކުރެވުނު ކަމަށެވެ.
އަދި ސައުދީ ފަންޑުން ރާއްޖެ އަށް ފޯރުކޮށްދެމުންދާ އެހީތެރިކަމަށް ޒަމީރު ވަނީ ޝުކުރު އަދާކުރައްވާފަ އެވެ.
ފޮރިން މިނިސްޓަރު ސައުދީ އަރަބިއްޔާއަށް ކުރައްވާ މި ދަތުރުފުޅަކީ މިނިސްޓަރ އޮފް ފޮރިން އެފެއަރސް އޮފް ދަ ކިންގްޑަމް އޮފް ސައުދީ ޢަރަބިއްޔާ، ޕްރިންސް ފައިސަލް ބިން ފަރްހާން އަލް-ސައުދުގެ ދައުވަތަކަށް ކުރައްވާ ދަތުރުފުޅެކެވެ.
މި ދަތުރުފުޅުގައި ރައީސް ޑރ.މުހައްމަދު މުއިއްޒުގެ ހާއްސަ ސިޓީފުޅެއް، ސަޢުދީ ވަލީއަހުދު އަދި ބޮޑުވަޒީރު، ޕްރިންސް މުހައްމަދު ބިން ސަލްމާން ބިން އަބްދުލްއަޒީޒް އަލް-ސައުދު އަށް ވަނީ އަރުވައިފަ އެވެ.
