މި އަހަރުގެ ފުރަތަމަ ހަ މަސް ދުވަހުގެ ތަފާސް ހިސާބު ފެމިލީ ކޯޓުން އާއްމުކޮށްފައިވާއިރު، މި އަހަރުގެ ޖުލައި މަހުގެ ނިޔަލަށް އެ ކޯޓަށް 1،073 މައްސަލައެއް ވަނީ ހުށަހަޅައިފަ އެވެ. އޭގެ ތެރެއިން 1،065 މައްސަލަވަނީ ބަލައި ނިންމާފަ އެވެ.
ފުރަތަމަ ހަ މަސް ދުވަހުގެ ތެރޭގައި 1121 ކައިވެނި ފެމިލީ ކޯޓުން ކޮށްދިނެވެ. އަދި ރާއްޖޭން ބޭރުގައި ކުރި 89 ކައިވެނި އެ ކޯޓުންވަނީ ފުރަތަމަ ހަ މަސް ދުވަހުގެ ތެރޭގައި ރަޖިސްޓްރީކޮށްދީފައެވެ. ފުރަތަމަ ހަ މަސް ތެރޭގައި ވަރީގެ 594 މައްސަލަ އެ ކޯޓުން ނިންމި އެވެ.
އާއިލީ މައްސަލަތަކާ ބެހޭ ބަޔަށް ފުރަތަމަ ހަ މަސް ތެރޭގައި 107 މައްސަލައެއް ހުށަހެޅިއިރު 60 މައްސަލައަކަށް ސުލްހަވެރި ހައްލެއް ހޯދައިދިން ކަމަށާއި ގެވެށި އަނިޔާ އާއި ކުޑަކުދިން ރައްކާތެރިކުރުމުގެ 47 އަމުރެއް މި މުއްދަތުގައި ނެރެފައިވާ ކަމަށް ފެމިލީ ކޯޓުގެ ތަފާސް ހިސާބުތަކުން ދައްކަ އެވެ.
ފެމިލީ ކޯޓުން ވަނީ މި އަހަރުގެ ފުރަތަމަ ހަ މަސް ދުވަހުގެ ތެރޭގައި އަނބިދަރީންގެ ހަރަދާއި އިއްދައިގެ ހަރަދުގެ ގޮތުގައި 38.4 މިލިއަން ރުފިޔާ ސާބިތުކޮށްފަ އެވެ.
