ހެލްތް މިނިސްޓަރު އަބްދުﷲ ހަލީލް އެކްސްގައި ކުރެއްވި ޕޯސްޓެއްގައި ވިދާޅުވީ އާންމުސިއްހަތަށް ނުރައްކާވާގޮތަށް ހުންނަ ވެށިތަކާއި ރައްކާތެރިނޫންގޮތަށް ކާނާ ތައްޔާރުކުރާނަމަ މައްސަލަ ރިޕޯޓް ކުރެވޭނެ ހާއްސަ 2 ނަންބަރެއް ކަނޑައަޅާފައިވާކަމަށެވެ.
އެގޮތުން އާންމު ސިއްހަތާ ގުޅޭ ޝަކުވާ ހުށަހެޅުމަށް 7960121 އަށް ގުޅުމަށް އަދި ކަބޯތަކެތީގެ ރައްކާތެރިކަމާއި ގުޅޭ ކަންކަން ރިޕޯޓް ކުރުމަށް 7603204 ގުޅުމަށް މިނިސްޓާ ވަނީ އިލްތިމާސްކުރައްވާފަ އެވެ.
ފަހަކަށް އައިސް ނުތާހިރު ތަންތަނުގައި ކާބޯތަކެތި ތައްޔާރު ކުރާ ވަރަށް ގިނަ މައްސަލަތަކެއް ވަނީ ފެންމަތިވެފަ އެވެ.
އިއްޔެގެ ވަގުތެއްގައި ވަނީ ކާބޯތަކެތި ރައްކާތެރިކަމުގެ ގާނޫނު ތަންފީޒްކުރަން ފަށާފަ އެވެ. އަދި ރައީސް ޑރ. މުހައްމަދު މުއިއްޒު، ކާބޯތަކެތީގެ ރައްކާތެރިކަމުގެ ގާނޫނުގެ ދަށުން "މޯލްޑިވްސް ފުޑް އެންޑް ޑްރަގް އޮތޯރިޓީ" އިއްޔެ ގާއިމުކުރައްވައި، އެ އިދާރާއަކީ ސިއްހީ ވުޒާރާގެ ދަށުން ހިންގަމުންދާ ތަނެއްގެ ގޮތުގައި ވަނީ ހަމަޖައްސަވާފަ އެވެ.
ރައީސް އޮފީހުން އިއްޔެ ނެރުއްވި ބަޔާނެއްގައި ބުނެފައި ވަނީ، އެ އޮތޯރިޓީ ގާއިމުކުރެއްވުމާ ގުޅިގެން، މިހާތަނަށް އެ މިނިސްޓްރީގެ ދަށުން ހިނގަމުން އައި، މޯލްޑިވްސް ފުޑް އެންޑް ޑްރަގް އޮތޯރިޓީ މިއަދުން ފެށިގެން އުވައިލައްވާފައިވާ ކަމަށެވެ.
