ހައިލަމް މިފަދައިން ވިދާޅުވެފައިވަނީ އޭނާގެ އަމިއްލަ ބްލޮގްގައި އާންމުކޮށްފައިވާ ލިޔުމެއްގައެވެ.
އެގޮތުން ހައިލަމް ވިދާޅުވެފައިވަނީ، ޤާނޫނު ހަދާ މަޖިލީހުން ލޯކަލް ކައުންސިލުތަކުގެ އިންތިހާބާ ގުޅުވައިގެން މިވަގުތު ކުރަންޖެހޭ އެއްވެސް ކަމެއް ނެތްކަމަށެވެ. އަދި ކައުންސިލް އިންތިހާބާއި މެދު ކަމެއްކުރަންޖެހޭ ކަމަށް ރައްޔިތުންގެ މަޖިލީހަށާއި ސަރުކާރަށާއި އިލެކްޝަންސް ކޮމިޝަނަށް ވެސް ޤަބޫލުކުރެވިފައިވަނީ ވަރަށް ބޮޑު އޮޅުމަކުންކަމުގައި ދެކޭކަމަށް ހައިލަމް ވިދާޅުވި އެވެ.
މީގެ އިތުރުން ހައިލަމް ވިދާޅުވެފައިވަނި ޤާނޫނުއަސާސީއަށް ގެނެވުނު ފަސްވަނަ އިސްލާހުގައި ކައުންސިލުތަކުގެ އުމުރު ފަސް އަހަރުދުވަސްކަމުގައި ބަލައި ގުނަންޖެހޭނީ ދެން އިންތިހާބު ކުރެވޭ ކައުންސިލުތަކުގެ އުމުރު ގުނުމުގައިކަމަށް ގަބޫލުކުރެވުނަސް "ޤާނޫނީ ހަގީގަތަކީ" އެއީ ނޫންކަމަށެވެ.
ހައިލަމް އޭނާގެ ލިޔުމުގައި ވިދާޅުވެފައިވަނީ، ޤާނޫނުއަސާސީއަށް ގެނެވުނު ފަސް ވަނަ އިސްލާހުގައިވާ ފުރަތަމަ ދެ މާއްދާގައި ބަޔާންކޮށްފައިވާ އުސޫލުތަކަކީ އިންތިހާބު ބާއްވަންވީ ގޮތް ބަޔާންކުރާ އުސޫލުތައްކަމަށެވެ. އަދި ތިން ވަނަ މާއްދާގައި ކައުންސިލްތަކުގެ ދައުރު ތިން އަހަރުން ފަސް އަހަރަށް އިތުރުވާކަމަށް ބަޔާންކޮށްފައިވާކަމަށާއި، ހަތަރު ވަނަ މާއްދާގައި ބުނަނީ ޤާނޫނުގައިވާ ގޮތުގެ މަތީން ލޯކަލް ކައުންސިލްތަކުގެ އިންތިހާބު ބާއްވާނީ ޤާނޫނަށް އަމަލުކުރަން ފެށުމަށް ފަހު ދެން އެންމެ އަވަހަށް ބާއްވާ އިންތިހާބެއް ގައިކަމަށެވެ.
ހައިލަމް ވިދާޅުވެފައިވަނީ ގެޒެޓްކުރެވުނު ދުވަހުން ފެށިގެން އަމަލުކުރުމުގެ އާންމު އުސޫލުގެ ތެރެއަށް ވަންނަ ގޮތަށް ޤާނޫނުގައި އޮތީ އެންމެ މާއްދާއެކަމަށާއި އެއީ ލޯކަލް ކައުންސިލްތަކުގެ އުމުރު ތިން އަހަރުން ފަސް އަހަރަށް ބަދަލުކުރި މާއްދާކަމަށެވެ.
ހައިލަމް ވިދާޅުވެފައިވަނީ މިކަމުގައި އޮޅުންއަރަންޖެހޭ ކަމެއް ނެތްކަމަށާއި، މިހާރު އޮތް ކައުންސިލްތަކުގެ ދައުރުގައި ބާކީ ދެ އަހަރު އެބައޮތްކަމަށެވެ.
ލޯކަލް ކައުންސިލްތަކުގެ އިންތިހާބު ފަސްކުރުމަށް ސަރުކާރުން ހާއްސަ ބިލެއް ރައްޔިތުންގެ މަޖިލީހަށް ހުށަހަޅާފައިވާއިރު އިންތިހާބު ބޭއްވެންދެން ޤާނޫނީ ހުސްކަމަކަށް ނުގޮސް ކައުންސިލްތަކުގެ ދައުރު ދަންމާލުމަށްވެސް ސަރުކާރުން ވަނީ ޤާނޫނުއަސާސީއަށް އިސްލާހެއް ހުށަހަޅާފައެވެ.
އެހެން ނަމަވެސް ޤާނޫނުއަސާސީއަށް މިވަގުތު އިތުރު އިސްލާހެއް ގެންނަން ނުފެންނަކަމަށް މަޖިލީހުގެ ރައިސް އަދި ކުރީގެ ރައީސް މުހައްމަދު ނަޝީދު ވިދާޅުވެފައިވުމުން މަޖިލީހުގެ ހެންވޭރު ހުޅަންގު ދާއިރާގެ މެމްބަރު ހަސަން ލަތީފް ވަނީ ކައުންސިލްތަކުގެ ދައުރު ދަންމާލުމަށް ހާއްސަ ބިލެއް މަޖިލީހަށް ހުށަހަޅާފައެވެ. އަދި މަޖިލީހުގެ ރައީސް ވަނީ އެ ބިލުގެ ފުރަތަމަ ކިޔުންވެސް އިއްވާފައެވެ.
