މިނިސްޓަރު ޒަމީރު މި ފަދައިން ވިދާޅުވީ މިއަދު އެޓާނީ ޖެނެރް އަހުމަދު އުޝާމް، އިކޮނޮމިކް މިނިސްޓަރު މުހައްމަދު ސައީދު، ފިނޭންސް މިނިސްޓަރު މުހައްމަދު ޝަފީގްވެސް ބައިވެރިވި ރައީސްއޮފީހުގައި ކުރިއަށް ދިޔަ ނޫސްވެރިންގެ ބައްދަލުވުމުގަ އެވެ.
މިއަދުގެ ވަގުތެއްގައި ބީއެމްއެލްއިން ވަނީ މިހާރު ދޫކޮށްފައިވާ ޑެބިޓް ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާ ނަމަ ރާއްޖޭން ބޭރުގެ މުއާމަލާތްކުރުމަށް އެއްވެސް އަދަދެއް ނުލިބޭ ގޮތަށް ބަދަލުގެނެސްފައިވާކަން ހާަމަކޮށްފަ އެވެ. އަދި އެހެން ބުނެ އެ ބޭންކުން ނެރުނު ދެ ވަނަ އިއުލާނުގައި ބުނީ ރާއްޖެ އިން ބޭރުގެ މުއާމަލާތް ކުރެވޭ ލިމިޓްތަކަށް ގެެނެވުނު ބަދަލުތައް ބޭންކްގެ ރެގިއުލޭޓާ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އިރުޝާދަށް ބަލައި މިހާރު އަނބުރާ ގެނެސްފައިވާ ކަމަށެވެ.
އެކަމާ ގުޅޭގޮތުން ޒަމީރު ވިދާޅުވީ ބީއެމްއެލްއިން އަމަލުކުރީ ބޭންކްއާއެކު މަޝްވަރާ ކުރެވުނު ގޮތަކަށް ނޫން ކަމަށެވެ.
އެކަން ހިނގައި ދިޔަ ގޮތް އިތުރަށް ތަފްސީލްކުރައްވަމުން އޭޖީ އުޝާމް ވިދާޅުވީ އިކޮނމިކް ކައުންސިލްއާއި ބީއެމްއެލްއާ ދެމެދުވެސް މަޝްވަރާތަކެއް ކުރެވުނު ކަމަށާއި އެެހެންނަމަވެސް މަޝްވަރާކޮށްގެން މިއަދު ބީއެމްއެލެއިން ޑިސިޝަން ނެގީ އެނގުނު ގޮތަކަށް ނޫންކަމަށެވެ.
އިކޮނޮމިކް މިނިސްޓަރު ސައީދު ވިދާޅުވީ ބީއެމްއެލްއާއެއްކޮށް އިކޮނޮމިކް ކައުންސިލްގައި ވަރަށް ތަފްސީލްކޮށް ވާހަކަ ދެއްކެވުނު ކަމަށާއި، ވާހަކަ ދެއްކުމަށްފަހު ދެފަރާތުންވެސް އެއްބަސްވީ ޑިސިޝަން އެއް މިވަގުތު ނުނެގުމަށްކަމަށެވެ.
އެފަދަ މުހިއްމު ކަަމަކަަށް ހުރަހެއް އެޅެންޏާ ސަރުކާރުން އެކަން ހައްުލު ކުރަން ޖެހޭ ހާލަތުގައި، ކޯޕޮރޭޓް ގަވާނަންސް ގެ އުސޫލުގެ ދަށުން ވާހަކަ ދައްކާނެކަމަށް ސައީދު ވިދާޅުވި އެވެ. އެންމެ ފަހުން ބީއެމްއެލްއިން ނިންމެވިގޮތަށް އަމަލުކުރަން ރައީސް ޑރ.މުއިއްޒުވެސް ބީއެމްއެލްގެ ސީއިއޯއާ މަޝްވަރާކުރެއްވި ކަމަށް ސައީދު ވިދާޅުވި އެވެ.
