ކާބޯތަކެތީގެ ހިދުމަތްދޭ ތަންތަން ރެޖިސްޓަރީ ކުރުމާއި އެފަދަ ތަންތަނަށް ހުއްދަ ދެމުން މީގެ ކުރިން ގެންދިޔައީ އެޗްޕީއޭ އިންނެވެ.
މިކަމާ ގުޅިގެން އެމްއެފްޑީއޭއިން ނެރުނު ބަޔާނެއްގައި ވަނީ، ކާބޯތަކެތީގެ ރައްކާތެރިކަމުގެ ގާނޫނު ތަންފީޒުކުރަން ފެށުމާ ގުޅިގެން، އެޗްޕީއޭ އިން ދެމުން ދިޔަ ކާބޯތަކެތީގެ ހިދުމަތްދޭ ތަންތަން ރަޖިސްޓްރީ ކުރުމާ ހުއްދަ ދިނުމުގެ މަސައްކަތް އެ އޮތޯރިޓީގެ ދަށަށް ބަދަލުކޮށްފައިވާ ކަމަށެވެ.
އެހެންވެ، "ވަންގަވް" ޕްލެޓްފޯމްގެ ދަށުން ދެމުންދިޔަ ކެފޭ ރެސްޓޯރަންޓް ރަޖިސްޓްރީކުރުމުގެ ހިދުމަތްތައް އެ އޮތޯރިޓީއަށް ބަދަލު ކުރުމުގެ މަސައްކަތް ކުރާތީ، މިއަދުން ފެށިގެން ބުރާސްފަތި ދުވަހުގެ ނިޔަލަށް "ވަންގަވް"ގެ ދަށުން އެ ހިދުމަތް ލިބުން މެދުކެނޑޭނެ ކަމަށް އެމްއެފްޑީއޭއިން ބުނެފައިވެއެވެ.
އެ ބަދަލާ ގުޅޭގޮތުން އިތުރު މައުލޫމާތު ހޯދުމަށް ރަސްމީ ގަޑިގައި ނަމަ 3014361 އަށް އަދި، ނުރަސްމީ ގަޑީގައި ނަމަ 7603204 އަކަށް ގުޅުމަށް ހެލްތު މިނިސްޓަރީން އެދިފައިވެ އެވެ.
ރައީސް ޑރ. މުހައްމަދު މުއިއްޒު ވަނީ ކާބޯތަކެތީގެ ރައްކާތެރިކަމުގެ ބިލު މިއަހަރުގެ މެއި މަހުގެ 23ވަނަ ދުވަހު ތަސްދީގުކުރައްވާފަ އެވެ. އަދި، އެ ގާނޫނަށް މިދިޔަ ހުކުރު ދުވަހުން ފެށިގެން ވަނީ އަމަލު ކުރަން ފަށާފަ އެވެ.
