އޭނާގެ މައްޗަށް ދައުވާ އުފުލާފައިވަނީ 2022 ވަނަ އަހަރުގެ ބައިނަލްއަގްވާމީ ޔޯގާ ދުވަސް ފާހަގަކުރަން ގަލޮޅު ދަނޑުގައި ބޭއްވި ޔޯގާ ހަރަކާތް ކުރިއަށް ދަނިކޮށް މީހުން ވަދެ ހިންގި ހަމަނުޖެހުންތަކާއި ގުޅިގެންނެވެ. މި މައްސަލާގައި 18 މީހެއްގެ މައްޗަށް ދައުލަތުން ވަނީ ދައުވާކޮށްފައެވެ.
މި މައްސަލާގައި މެމްބަރު މުހައްމަދު އިސްމާއިލްގެ މައްޗަށް އުފުލާފައިވަނީ ޓެރަރިޒަމްގެ އަމަލެއް ކުރުމުގައި ބައިވެރިވުމުގެ ދައުވާއެވެ. އެ ދައުވާ ސާބިތުވެއްޖެނަމަ ދިގު މުއްދަތެއްގެ ޖަލު ހުކުމެއް އަންނާނެއެވެ. މި މައްސަލައިގެ އަޑުއެހުން މިއަދަށް ވަނީ ތާވަލުކޮށްފައެވެ. އެހެންނަމަވެސް މިއަދުގެ އަޑުއެހުން ވަނީ ކެންސަލްކޮށްފައެވެ.
ކްރިމިނަލް ކޯޓުން ބުނީ މިއަދުގެ އަޑުއެހުން ކެންސަލްކުރީ މުހައްމަދު އިސްމާއިލް ކޯޓަށް ހާޒިރުނުވުމުންކަމަށެވެ.
ޔޯގާ ދުވަހުގެ ހިނގި ހަމަނުޖެހުންތަކާ ގުޅިގެން ޝައިހް ފަޒްލޫން މުހައްމަދާއި ޝައިހް އާދަމް ނިޝާންގެ މައްޗަށް ވެސް ދައުވާ ކުރެ އެވެ. އެ މައްސަލާގެ އަޑުއެހުމެެއްވެސް މިއަދު ތާވަލުކުރިއެވެ. ނަމަވެސް ވަކީލުން ނެތުމުން އެ މައްސަލާގެ އަޑުއެހުން މިއަދު ވަނީ ކެންސަލްކޮށްފައެވެ.
