ފަސް މިލިއަން ގަސް އިންދުމުގެ ޕްރޮގްރާމް ރައީސް މުއިއްޒު އިއުލާންކުރެއްވީ، މިދިޔަ ޑިސެމްބަރު މަހު ދުބާއީގައި ބޭއްވި "ކޮޕް28"ގައި ދެއްވި ތަގުރީރުގަ އެވެ.
މި ޕްރޮގްރާމްގައި އިސްކަންދެނީ ރާއްޖެއިން ނެތިގެން ހިނގައިދާނެ ކަމުގެ ބިރުހީވެފައިވާ ގަސްތައް އިންދުމަށެވެ.
ރައީސް މުއިއްޒު ފައްޓަވައިދެއްވާފައިވާ "5 އަހަރުން 5 މިލިއަން ގަސް" ޕްރޮގްރާމުގައި ބައިވެރިވުމުގެ ގޮތުން ސްޓެލްކޯއިން އަންނަނީ 5 އަހަރުތެރޭގައި 5 ލައްކަ ގަސް އިންދުމުގެ ހަރަކާތެއް ކުރިއަށް ގެންދަމުންނެވެ.
ސްޓެލްކޯއިން ބުނީ މިހާތަނަށް 30،371 ގަސް އިންދިފައިވާއިރު، ފަސް ލައްކަ ގަސް އިންދުމުގެ އަމާޒަށް ވާސިލް ވުމަށް، ކުރިއަށް އޮތް ތަނުގައި ކޮންމެ މަހަކުވެސް އެ ކުންފުނިން ހިދުމަތްދޭ ރަށްރަށުގައި ގަސް އިންދުމުގެ ހަރަކާތް ކުރިއަށް ގެންދާނެ ކަމަށެވެ.
ރާއްޖެ ފެހިކުރުމަށާއި ގަސްތަކުގެ މާހައުލީ ނިޒާމްތައް ރައްކާތެރިކޮށް ދެމެހެއްޓުމާއި މޫސުމީ ބަދަލުން ދިމާވާ ނުރައްކާތަކަށް ރާއްޖޭގެ ވިލުންތެރިކަން އިތުރުކުރުމަށްޓަކައި ފަސް އަހަރުގެ ތެރޭގައި، ފަސް މިލިއަން ގަސް ރާއްޖޭގެ އެކިކަންކޮޅުތަކުގައި އިންދުމުގެ މަޝްރޫއެއް ކުރިއަށް ގެންދިއުމަކީ ރައީސްގެ ރިޔާސީ ވައުދެކެވެ.
