ބަންގުލަދޭޝުގެ ހޯމް މިނިސްޓްރީން އެ ގައުމުގެ ގެެޒެޓުގައި ޝާއިއުކުރި ނޯޓިހެއްގައި ބުނެފައިވަނީ ޖަމާއަތު އަލް-އިސްލާމީ ޕާޓީ އާއި އެޕާޓީއާ ގުޅިފައިވާ ޖަމާއަތަކުން ޓެރަރިޒަމްގެ ހަރަކާތެއްގައި ބައިވެރިވެ ޝާމިލުވެފައިވާ ކަމުގެ އެއްވެސް ސާބިތު ހެއްކެއް ނެތް ކަމަށެވެ.
ހަސީނާގެ ސަރުކާރާ ދެކޮޅަށް ބަންގްލަދޭޝްގެ ކޮލެޖުތަކާއި ޔުނިވާސިޓީތަކުގެ އެތަކެއް ހާސް ދަރިވަރުން ނިކުމެ ކުރަމުން ދިޔަ މުޒާހަރާތަކާ ގުޅިގެން އޭނާ ވަނީ އިންޑިޔާއަށް ވަޑައިގަންނަވައި، ހިމާޔަތް ހޯއްދަވާފަ އެވެ.
އިންޑިޔާއަށް ވަޑައިގެންނެވުމުގެ ކުރިން ހަސީނާ އިސްތިއުފާ ދެއްވާފައިވާ ކަން އިއުލާނު ކުރެއްވީ އަސްކަރިއްޔާގެ އިސް ކޮމާންޑަރު, ޖެނެރަލް ވާކިރު އަލްޒަމާނެވެ.
ބަންގްލަޑޭޝްގައި ވަގުތީ ސަރުކާރެއް ގާއިމްކޮށް، ވެރިއަކަށް ޕްރޮފެސަރު މުހައްމަދު ޔޫނުސް ހަމަޖެއްސެވީ ބަންގްލަދޭޝްގެ ބޮޑުވަޒީރުގެ މަގާމުގައި ހުންނެވި ޝޭހް ހަސީނާ އިސްތިއުފާ ދެއްވައި ގައުމުން ފިއްލެވުމާ ގުޅިގެންނެވެ.
ހަސީނާގެ ވެރިކަން ވެއްޓުމާ ގުޅިގެން ބަންގްލަދޭޝްގައި އެކުލަވައިލާފައިވާ ވަގުތީ ސަރުކާރުން ބުނީ, ޖަމާއަތު އަލް-އިސްލާމީއާއި, އެ ޕާޓީއާއި ގުޅިފައިވާ ގުރޫޕުތަކާއި ނިރުބަވެރި ޖަމާއަތްތަކާ އެއްވެސް ގުޅުމެއް އޮތް ކަން ސާބިތު ކުރެވޭނެ ހެއްކެއް ފެންނަން ނެތް ކަމުގަ އެވެ.
ނިރުބަވެރި ޖަމާއަތްތަކާ ގުޅުން އޮތް ކަމަށް ހަސީނާގެ ސަރުކާރުން ކޮށްފައިވާ ތުހުމަތުތައް ޖަމާއަތު އަލް-އިސްލާމީ ޕާޓީން އަބަދުވެސް އައީ ދޮގު ކުރަމުން ނެވެ.
