ގަވައިދާ ހިލާފަށް އުޅޭ ބިދޭސީން ހޯދުމަށް އިއްޔެ އިމިގްރޭޝަނުން ހިނގި އޮޕަރޭޝަންގައި އިދާރާގައި 211 އޮފިސަރުން މާލޭގެ މަގުތަކަށް ވަނީ ނުކުމެފައެވެ. މި އޮޕަރޭޝަންގައި މާލެ ސަރަހައްދުގެ 26 ޒޯނެއް ބަލައި ވަނީ ފާސްކޮށްފައެވެ.
އިމިގްރޭޝަނުން ބުނީ އިއްޔެ ހިންގި ބޮޑު އޮޕަރޭޝަންގައި، ވިސާ ފުރިހަމަ ނުކޮށް ރާއްޖޭގައި އުޅުނު 273 މީހުން އަތުލައިގެންކަމަށެވެ. އަދި އެ އެންމެނަށް ނޯޓިސް ދީފައިވާކަމަށްވެސް އިމިގްރޭޝަނުން ބުނެއެވެ. މީގެއިތުރުން ފިލައިގެން އުޅޭކަމަށް ރިޕޯޓްކޮށްފައިވާ 10 ބިދޭސީއަކުވެސް ފެނިފައިވާކަމަށާއި އެމީހުން އެ އިދާރާގެ ބެލުމުގެ ދަށަށް ގެނެސްފައިވާކަމަށްވެސް އިމިގްރޭޝަނުން ބުނެއެވެ.
އިއްޔެ ހިންގި އޮޕަރޭޝަންގައި އިމިގްރޭޝަން އޮފިސަރުން މާލޭގެ ފިހާރައެއް ބަލަނީ
ބިދޭސީންގެ އިތުރުން ގަވައިދާ ހިލާފަށް ބިދޭސީން ގެންގުޅޭ ދިވެހިންްވެސް އިއްޔެގެ އޮޕަރޭޝަނުން ފާހަގަވިކަމަށް އިމިގްރޭޝަނުން ބުނެއެވެ. އެގޮތުން ގަވާއިދާ ހިލާފަށް ބިދޭސީން ލައްވާ މަސައްކަތް ކުރުވި 120 ދިވެހިންނަށް ލިޔުމުން ނަސޭހަތް ދީފައިވާކަމަށްވެސް އިމިގްރޭޝަނުން ބުނެއެވެ.
މި ސަރުކާރުން ހަވާލުވި ފަހުން، މިދިޔަ އާދިއްތަ ދުވަހުގެ ނިޔަލަށް 3،322 ބިދޭސީން ޑީޕޯޓުކޮށްފައިވާ ކަމަށް އިމިގްރޭޝަނުން ވަނީ ބުނެފައެވެ. އަދި ގަވާއިދާ ހިލާފަށް އުޅޭ ބިދޭސީން ހޯދުމަށް މިހާތަނަށް 257 ތަނެއް ރެއިޑުކޮށްފައިވާ ކަމަށްވެސް އިމިގްރޭޝަނުން ބުނެއެވެ.
