ހޯމްލޭންޑް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި އިހުސާން ވިދާޅުވީ ރާއްޖެއަށް ގެންނަ ބިދޭސީ މަސައްކަތްތެރިންގެ ޕްރޮސެސް ފުރިހަމަ ކުރަން ބެސްޓިނެޓް އާއެކު އެއްބަސްވުމެއްގެ މަސައްކަތް ފެށީ ކުރީގެ ރައީސް އަބްދުﷲ ޔާމީންގެ ވެރިކަމުގައި 2015 ވަނަ އަހަރުގެ ތެރޭގައި ކަމަށެވެ.
ނަމަވެސް، 2019 ވަނަ އަހަރު ރާއްޖެއަށް ބަންގްލަދޭޝްއިން މަސައްކަތްތެރިން އެތެރެކުރުން ހުއްޓުވަން ނިންމުމާއެކު 15 އަހަރުގެ މުއްދަތަށް ހެދި އެއްބަސްވުމަށް އަމަލުކުރުން ހުއްޓުނީ ކަމަށް އޭނާ ވިދާޅުވި އެވެ.
އިހްސާން ވިދާޅުވީ އެ އެއްބަސްވުމާ ގުޅިގެން ގެއްލުމުގެ ބަދަލުގެ ގޮތުގައި 13.7 މިލިއަން ޑޮލަރު އެ ކުންފުންޏަށް ދޭންޖެހޭތީ، އެއްފަހަރާ އެ ފައިސާ ދެއްކެން ނެތުމުން އޭގެ ބަދަލުގައި އާ އެކްސްޕެޓް ސިސްޓަމެއް ގާއިމު ކުރުމުގެ އެއްބަސްވުމަކަށް ދިޔައީ ކަމަށެވެ.
އިހުސާން ވިދާޅުވި ގޮތުގައި، އާ ސިސްޓަމާއެކު ރާއްޖެއަށް އަންނަ ބިދޭސީ މަސައްކަތްތެރިންގެ އަތުން ލިބޭ ފައިސާ އެތައް ގުނައެއް އިތުރުވާނެ އެވެ. އަދި ވިދާޅުވީ އެ އަދަދު ބެސްޓިން އަށް ދިން ނަމަވެސް އެއިން ގެއްލުމެއް ނުވާނެ ކަމަށެވެ. އެގޮތުން މިހާރު ހުރި ސިސްޓަމާ އެކު އޮފީސް ހިންގުމަށާއި މުވައްޒަފުންނަށް ކުރާ ހަރަދު މާ ބޮޑު ކަމަށް އޭނާ ވިދާޅުވި އެވެ. ނަމަވެސް ބެސްޓިންގެ ސިސްޓަމާ އެކު އެ ހަރަދުތަކާ ހަވާލުވާނީ އެ ކުންފުނިން ކަމަށް ވިދާޅުވި އެވެ.
އާ ސިސްޓަމް އަންނަ ފެބްރުއަރީ މަހު ބޭނުން ކުރަން ފެށޭނެ ކަމަށާއި އެއާއެކު ކުރިން ސަރުކާރުން ހަރަދުތައް ކުރަމުން އައި މުވައްޒަފުންގެ މުސާރައަށް ވެސް ހޭދަ ކުރަން ނުޖެހޭނެ ކަމަށް ވެސް ވިދާޅުވި އެވެ.
