ފޮރިން މިނިސްޓްރީން ނެރުނު ބަޔާނެއްގައި ބުނީ ފަތްކޮޅު އެރުވުމަށްފަހު ބޭއްވި ބައްދަލުވުމުގައި ރައީސް ޑރ. މުހައްމަދު މުއިއްޒުގެ ފަރާތްޕުޅުން ރައީސް އުރްދުޣާން އަށް ތަހުނިޔާ އަބްދުއްރަހީމް އަރިސްކުރެއްވިކަމަށެވެ.
އަދި އެކި ދާއިރާތަކުން ރާއްޖޭއާ ތުރުކިޔޭ އާ ދެމެދު އޮތް ގުޅުން އިތުރަށް ހަރުދަނާކުރުމަށް ގުޅިގެން މަސައްކަތް ކުރަމުން ގެންދާނެކަމުގެ ޔަގީންކަން އަބްދުއްރަހީމް އުރްދުޣާން އަށް އެރުވިކަމަށްވެސް ފޮރިން މިނިސްްޓްރީން ބުނެއެވެ.
މި ބައްދަލުވުމުގައި ރާއްޖެ އާއި ތުރުކީ އާ ދެމެދު އޮތް ގާތްގުޅުން އިތުރަށް ބަދަހިކުރުމުގެ މަސައްކަތުގައި ފުރިހަމަ އެއްބާރުލުން ލިބޭނެކަމުގެ ޔަގީންކަން އުރުދުޣާން ދެއްވިކަމަށްވެސް ފޮރިން މިނިސްޓްރީގެ ބަޔާނުގައިވެއެވެ.
އަބްދުއްރަހީމް ސަފީރުކަމުގެ ފަތްކޮޅު އުރްދުޣާންއަށް އެރުވުމުގެ ރަސްމިއްޔާތުގެ ތެރެއިން
ޗީފް އޮފް ޑިފެންސް ފޯސްގެ މަޤާމުގައި ހުންނަވާ ލެފްޓިނެންޓް ޖެނެރަލް އަބްދުއްރަހީމް އަބްދުއްލަތީފް، ސިފައިންގެ ހިދުމަތުން ޝަރަފުވެރިކަމާއެކު ރިޓަޔާ ކުރެއްވީ މިދިޔަ އޭޕްރިލް މަހުގެ 18 ވަނަދުވަހުއެވެ. އޭނާ އުމުރުން 60 އަހަރުގައި ސިފައިންގެ ހިދުމަތުން ރިޓަޔާކޮށްފައިވަނީ 39 އަހަރުގެ ހިދުމަތަށްފަހުއެވެ.
