ދުނިޔޭގެ އެންމެ މަޝްހޫރު ކްރެޑިޓް އޭޖެންސީތަކުގެ ތެރެއިން އެއް އޭޖެންސީ ކަމަށްވާ ފިޗް އިން ރާއްޖެ "ސީސީ" ރޭޓިން އަކަށް ދަށްކޮށްފަ އެވެ.
ރާއްޖެއަށް ކުރިން ދީފައިވަނީ "ސީސީސީ ޕްލަސް" އެވެ. އޭގެ ކުރިން ރާއްޖެއަށް ދީފައި އޮތީ "ސީސީސީ" ރޭޓިން އެކެވެ. މިއީ މި އަހަރު ރޭޓިން ދަށްކުރި ދެވަނަ ފަހަރެވެ.
މި ރޭޓިން އަކީ ކުރިން ދީފައިވާ ރޭޓިން އަށްވުރެ ތިން ދަރަޖަ ދަށް ރޭޓިން އެކެވެ. ފިޗުން ރޭޓިން ދަށްކުރި ސަބަބުތަކުގެ ކުރިން ފަހަރެކޭ އެއް ފަދައިން ރާއްޖޭގެ ރިޒާވުތައް އިންތިހާއަށް ދަށްވުމާއި ބޭރުގެ ދަަރަނި އަދާކުރަން ހުރި ހިރާސްތައް، ހާއްސަކޮށް މި އަހަރުގެ ފަހު ކުއާޓަރާއި ކުރިއަށް އޮތް ދެ އަހަރުން ދަައްކަން ހުރި ބޮޑެތި ދަރަނިތައް ފާހަގަކޮށްފައިވެ އެވެ.
އެމްޑީޕީން މިއަދު ނެރުނު ނޫސް ބާޔާނެއްގައި ބުނީ ވޭތުވެދިޔަ ތިން މަހުގެ ތެރޭގައި ދެވަނަ ފަހަރަށް، އަދި އެއްފަހަރާ ތިން ދަރަޖަ ތިރިއަށް ކްރެޑިޓް ރޭޓިން ދަށްކުރުމުން ސަރުކާރުން ގެންގުޅޭ ދޯހަޅި ސިޔާސަތުން މާލީ ހާލަތު އިންތިހާއަށް ގޯސްވަމުންދާކަން އެނގޭ ކަމަށެވެ.
އަދި ދައުލަތުގެ މާލީ ހިސާބުތައް އާންމު ކުރުމަށް އަލުން ފެށުމަށާއި ރައްޔިތުންނަށް ތެދު ހާމަކުރުމަށާއި ދެފުށް ފެންނަ ގޮތެއްގައި ކުރިއަށް ދިއުމަށް ވެސް ވަނީ ގޮވާލާފަ އެވެ. އެމްޑީޕީން ބުނީ އެ ޕާޓީން ދެކޭ ގޮތުގައި މައްސަލަތަކާ ގުޅުންހުރި ކަންކަން ދެނެގަތުމަކީ މި ހާލަތުގެ ނުރައްކާތެރިކަން ވަޒަންކުރުމަށް ވަރަށް މުހިންމު ކަމެއް ކަމަށެވެ.
ފިޗުގެ ރޭޓިން އާ ގުޅިގެން ފިނޭންސް މިނިސްޓްރީ އިން މިއަދު ނެރުނު ބަޔާނެއްގައި ބުނީ، މާލީ ދާއިރާއަށާއި ބޭރު ފައިސާ ހޯދުމަށް ކުރިމަތިވެފައިވާ ދަތިތަކަށް ދާއިމީ ހައްލެއް ހޯދުމަށް އާމްދަނީއާއި ހަރަދުގެ ސިޔާސަތުތައް ވަށާޖެހޭގޮތެއްގައި ރިފޯމްކޮށް މެދުރާސްތާއަށް ދަރަނި ނަގަންޖެހޭ މިންވަރު ކުޑަކުރުމަށް ފިޔަވަޅުތަކެއް އަޅައި ތަންފީޒުކުރުމަށް ތައްޔާރުވަމުންދާ ކަމަށެވެ.
އެގޮތުން ސަރުކާރުން ދައުލަތުގެ މާލީ ހާލަތާއި ބޭރު ފައިސާ ލިބުމަށް ހުރި ދަތިތައް ހައްލުކުރުމަށް ދައުލަތަށް ލިބޭ އާމްދަނީ އިތުރުކޮށް ހަރަދު ކުޑަކުރުމަށް ހަރުދަނާ ސިޔާސަތުތަކެއް އެކުލަވާލާފައިވާ ކަމަށް އެ މިނިސްޓްރީ އިން ބުންޏެވެ.
- އިތުރަށް ކިޔާލަން: ގައުމީ އުފެއްދުންތެރިކަމުގެ ނިސްބަތުން ޖުމްލަ ދަރަނި ކުޑަކުރެވޭނެ: ފިނޭންސް
ފިޗުން ދިން ސީސީ ރޭޓިންގެ މާނައަކީ، ދަރަނި އަނބުރާ ދެއްކުމަށް ރާއްޖެއަށް ބޮޑެތި ރިސްކުރައް ހުރިކަމެވެ. ފިޗުން ބުނީ މިދިޔަ މެއި މަހު 494 މިލިއަން ޑޮލަރުގައި ހުރި ބޭރު ފައިސާގެ ރިޒާވް، ޖުލައި މަހާ ހަމައަށް 395 މިލިއަން ޑޮލަރަށް ދަށްވެފައިވާ ކަމަށެވެ.
ކްރެޑިޓް ރޭޓިންއަކީ އިންވެސްޓަރުންނަށް އެ މީހުންގެ އިންވެސްޓުމެންޓުގެ ފައިދާ ނެގޭނެ މިންވަރާއި އެ ގައުމެއްގެ ދަރަނި އަދާކުރުމުގެ ގާބިލުކަން ހުރި މިންވަރު އަންދާޒާކުރެވޭ އިންޑިކޭޓަރެކެވެ. އިންވެސްޓަރުންގެ އިތުބާރު ހޯދުމަށް ރަނގަޅު ކްރެޑިޓް ރޭޓިންއެއް މުހިއްމުވަނީ މި ސަބަބާހުރެއެވެ.
ކްރެޑިޓް ރޭޓިން ދަށްވުމަކީ އިންވެސްޓަރުންނަށް އޮތް ރިސްކު ބޮޑުކަން އަންގައިދޭ އިންޑިކޭޓާއެކެވެ. މިއީ ދަރަނި ބޮޑުވެ، ދަރަނި ނުދެއްކޭ ހާލަތަށް އިގުތިސާދު ގޮސްދާނެ ކަމަށް ބެލެވޭ އިންޒާރެކެވެ.
