ކިންގްސް ކަޕަކީ ކްލަބް މޯލްޑިވްސް މުބާރާތްތައް ފެށުމުގެ ގޮތުން ކުޅޭ މެޗެވެ. މި މެޗުގައި އެންމެ ފަހުގެ ޗެމްޕިއަން ކްލަބް ވެމްކޯ ނުކުންނާނީ ރިސޯޓް ޗެމްޕިއަންސް ލީގުގެ ޗެމްޕިއަން، ޖޯލި ބީންއާ ދެކޮޅަށެވެ. މި މެޗުގައި ވެމްކޯ ޓީމް ލީޑު ކުރާނީ ދަގަނޑޭއެވެ.
ރާއްޖޭގެ އެންމެ ގިނަ ދުވަސްވީ އަދި އެންމެ ފޯރިގަދަ ފުޓްސަލް މުބާރާތް ކަމަށްވާ ކްލަބް މޯލްޑިވްސް ކަޕްގައި ދަގަނޑޭ ވަނީ މީގެ ކުރިން، މޯލްޑިވްސް ޕޯޓްސް ލިމިޓެޑް (އެމްޕީއެލް) އަށް ކުޅެފަ އެވެ.
ކްލަބް މޯލްޑިވްސް މި އަހަރު ބާއްވާ ތިން މުބާރާތަކީ ކްލަބް މޯލްޑިވްސް ކަޕް، ކްލަބް މޯލްޑިވްސް ކްލަސިކް އަދި އެއިޓީން ތާޓީ ފުޓްސަލް ފިއެސްޓާ އެވެ. ކްލަބް މޯލްޑިވްސް މުބާރާތްތައް ފަށާނީ އާދިއްތަ ދުވަހުގެރޭ ރިސޯޓް ލީގު ޗެމްޕިއަނުން، ޖޯލި ބީން އާއި މިދިޔަ އަހަރުގެ ކްލަބް މޯލްޑިވްސް ކަޕް ޗެމްޕިއަން، ވެމްކޯ އިން ކުޅޭ ކިންގްސް ކަޕް މެޗުންނެވެ.
