ފޯ ސީޒަންސް މޯލްޑިވްސް ޗެމްޕިއަންސް ޓްރޮފީ މުބާރާތް ކުރިއަށްދާނީ މާލެ އަތޮޅު ކުޑަހުރާ ރިސޯޓް ކާރީ އޮންނަ ރާޅު ފޮއިންޓުގައެވެ.
ދުނިޔޭގެ ޗެމްޕިއަނުންނާއެކު ކުރިއަށްދާ މި މުބާރާތް ކުރިއަށްދާނީ ތިން ކެޓަގަރީއަކަށް ބަހާލައިގެން ނެވެ. އެ ތިން ކެޓަގަރީއަކީ ސިންގަލް ފިން، ޑަބަލް ފިން އަދި ތުރަސްޓާގެ ކެޓަގަރީ އެވެ.
ދުނިޔޭގެ ޗެމްޕިއަނުންނާއެކު މި އަހަރުވެސް ދިވެހި ރާޅާ އެޅުންތެރިއަކު މުބާރާތުގައ ބައިވެރިވެއެވެ. މި ފަހަރު މުބާރާތުގައި ބައިވެރިވާ ދިވެހި އެތްލީޓަކީ، ދިވެހި ކުޅަދާނަ ރާޅު ޗެމްޕިއަން އަހުމަދު އާގިލް (އައްމަޑޭ) އެވެ. އައްމަޑޭއަކީ ރަންނަމާރި ޗެލެންޖު 1445 ގެ ޗެމްޕިއަންއެވެ.
މި މުބާރާތަކީ 25،000 ޑޮލަރުގެ އިނާމެއް ހުށަހެޅިފައިވާ މުބާރާތެކެވެ. ފޯ ސީޒަންސް މޯލްޑިވްސް ޗެމްޕިއަންސް ޓްރޮފީގައި ބައިވެރިވާ ރާޅާއެޅުންތެރިންގެ ތެރޭގައި ފަސް ފަހަރު ދުނިޔޭގެ ޗެމްޕިއަންކަން ހޯދާފައިވާ ހަވާއީގެ ދުނިޔޭގެ ކެރީސާ މޫރާއި އޮލިމްޕިކް މެޑަލް ހޯދާފައިވާ އޮސްޓްރޭލިއާގެ އޮވެން ރައިޓް އަދި އަދި ސައުތު އެފްރިކާގެ މައިކީ ފެބްރުއަރީ ހިމެނެއެވެ.
މި އަހަރުގެ އިންވިޓޭޝަނަލް ރާޅާ އެޅުންތެރިންގެ ތެރޭގައި އައްމަޑޭގެ އިތުރުން ފްރާންސްގެ ޖެރެމީ ފްލޮރެސް އަދި ބްރެޒިލްގެ ޖޭޑްސަން އަންދްރޭ ހިމެނެއެވެ.
