މިދިޔަ ހަފްތާގައި އެމްޑީޕީން ޕްރެސްއެއް ބޭއްވި ވަގުތާއި ބޭންކް އޮފް މޯލްޑްޑިވްސް ކާޑު ލިމިޓަަށް ބަދަލު ގެނައި ވަގުތާ ދިމާވުން އެއީ ގާނޫނީ ސަރުކާރެއް ގައިރު ގާނޫނީކޮށް ބަދަލުކޮށްލުމަށް ކުރެވިގެން ދިޔަ ކަމެއް ކަމަށް ބެލުމުގެ ޖާގަ އޮތުމުން އެ މައްސަލަ ބަލަމުން އަންނަކަމަށް ފުލުހުން ވަނީ ބުނެފައެވެ. އަދި އެކަމަކީ "މާލީ ބަގާވާތެއް" ކަމަށް ރައީސް ޑރ. މުހައްމަދު މުއިއްޒު ވަނީ ސިފަކުރައްވާފަ އެވެ.
މިދިޔަ ސަރުކާރުގެ ފިނޭންސް މިނިސްޓަރުކަން ކުރައްވާފައިވާ އިބްރާހިމް އަމީރު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ އަންނަ ހަފްތާގައި އެމް.ޑީ.ޕީ ގެ އިގުތިސާދީ ކޮމިޓީގެ ފަރާތުން ޕްރެސް ކޮންފަރެންސް އެއް ބާއްވަން ވިސްނަމުން ގެންދަވާކަމަށެވެ. އަދި ގާނޫނާއި ގަވާއިދާ ހިލާފު ނުވާނެ ގޮތަކަށް މިކަން ކުރަން ދައުލަތުގެ އެއްވެސް އިދާާރާއަކުން ކަމެއް ނިންމާ އިއުލާންކުރަން ހަމަޖެހިފައިވޭތޯ އަމީރު ވަނީ ސުވާލުކުރައްވާފަ އެވެ. އަމީރު މި ސުވާލުތައް އުފައްދަވާފައިވާއިރު ފުލުހުން ބަލަމުންދާ މައްސަލާގައި ހިމެނޭ ޕްރެސްގައި މައުލުމާތު ދެއްވަން އެދުވަހު އިންނެވީވެސް އަމީރެވެ.
އަމީރުގެ މި ވާހަކަތަކަށް ޖަވާބު ދެއްވީ ފުލުހުންގެ އިދާރާ ބަލަހައްޓަވާ ހޯމް މިނިސްޓަރު އަލީ އިހްސާން އެވެ. އޭނާ އަމީރުގެ ސުވާލު ޝެއާކޮށް އެކްސްގައި ކުރެއްވި ޕޯސްޓްގައި ވިދާޅުވީ ޕްރެސް ކޮންފަރެންސް ބޭއްވުމަކީ ގާނޫނާއި ގަވައިދާ ހިލާފުކަމެއް ނޫންކަމަށެވެ. އެހެންނަމަވެސް އިއްތިފާގުތައް ދިމާވިއްޔާ ޝައްކުކަމަށް ވިދާޅުވިއެވެ.
ފުލުހުން ނެރުނު ބަޔާނެއްގައި ބުނީ ސަރުކާރުގެ މައި ހިއްސާ އޮންނަ ބޭންކަކުން ސަރުކާރުގެ މަޝްވަރާއާ ހިލާފަށް ދިވެހި ގިނަ ރައްޔިތުންނަށް ކުއްލި ސިހުމެއް ލިބޭފަދަ ނިންމުންތަކެއް ނިންމި ވަގުތާ ދިމާކޮށް ސިޔާސީ ފަރާތްތަކުން ސަރުކާރުގެ މާލީ ހާލަތާއި ބެހޭ ގޮތުން ނޫސްވެެރީންގެ ބައްދަލްވުމެއް ބާއްވައި ހަމަ އެވަގުތު ސޯޝަލް މީޑިއާގައި އެތައް ސަތޭކަ ބޮޓް އެކައުންޓް ބޭނުންކޮށް ސަރުކާރު ވައްޓާލަން މަގުތަކަށް ނިކުތުމަށާއި އާންމު ހަމަޖެހުން ނަގާލުމަށް ގޮވާލާ ގައުމުގެ މަސްލަހަތު ނަގާލުމަށް ހިތްވަރުދީ ހަދާފައިވާ ކަމަށެވެ.
މިކަމަކީ ގާނޫނީ ސަރުކާރެއް ގައިރު ގާނޫނީކޮށް ބަދަލުކޮށްލުމަށް ކުރެވިގެން ދިޔަ ކަމެއް ކަމަށް ބެލުމުގެ ޖާގަ އޮތުމުން މި މައްސަލަ ދިވެހި ފުލުހުންގެ ހިދުމަތުން ތަހުގީގު ކުރަން ފަށާފައިވާ ކަމަށް ބަޔާނުގައިވެ އެވެ.
