ޓީޓުވެންޓީ ވޯލްޑް ކަޕް ކޮލިފައިންގައި ދިވެހި ގައުމީ ކްރިކެޓް ޓީމު ބަލިވީ މެލޭޝިއާ އާއި ސިންގަޕޫރު އަތުންނެވެ. ރާއްޖޭން ފުރަތަމަ މެޗުގައި މެލޭޝިއާ އަތުން ބަލިވީ، 94 ލަނޑުންނެވެ. ދެ ވަނަ މެޗުގައި، ސިންގަޕޫރު އަތުން ބަލިވީ، 47 ލަނޑުންނެވެ.
މެލޭޝިޔާ މެޗުގައި ރާއްޖެ އަށް ޓޯސް ދިމާވުމުން ނިންމީ ހޮވާށެވެ. ފުރަތަމަ އިނިންގްސްގައި މެލޭޝިއާ އިން ކުޅެން އަރައި، 20 އޯވަރުގެ ތެރޭގައި ތިން ކުޅުންތެރިން ނުބައިވިއިރު، 203 ލަނޑު ހެދި އެވެ. ޖަވާބުގައި ރާއްޖޭން ކުޅެން އަރައި، 20 އޯވަރުގެ ތެރޭގައި ހަ ކުޅުންތެރިން ނުބައިވިއިރު، ހެދުނީ 109 ލަނޑެވެ. ރާއްޖޭން އެންމެ ރަނގަޅަށް ކުޅުނީ ޓީމުގެ ވައިސް ކެޕްޓަން، އާދަމް ނާސިފް އުމަރު އެވެ. އޭނާ ވަނީ 32 ބޯޅައިން 46 ލަނޑު ހަދައިފަ އެވެ. އަޒްޔާން ވަނީ، 37 ބޯޅައިން 25 ލަނޑު ހަދައިފަ އެވެ.
ސިންގަޕޫރުން ރާއްޖެއާ ދެކޮޅަށް ކުޅުނު މެޗުގައި ޓޮސް ދިމާވުމުން، ނިންމީ ކުޅެން އަރާށެވެ. ސިންގަޕޫރަށް 20 އޯވަރުގެ ތެރޭގައި ހަތް ކުޅުންތެރިން ނުބައިވެގެން ހެދުނީ 153 ލަނޑެވެ. ޖަވާބުގައި ރާއްޖޭން ކުޅެން އަރައި، 20 އޯވަރުގެ ތެރޭގައި އަށް ކުޅުންތެރިން ނުބައިވެގެން ރާއްޖެ އަށް ހެދުނީ 106 ލަނޑެވެ. އެންމެ ރަނގަޅު ކުޅުމެއް ދެއްކީ، ނުބައިނުވެ، 25 ލަނޑު ހެދި މުހައްމަދު ޝިޔާމް އާއި 14 ބޯޅައިން 20 ލަނޑު ހެދި އިސްމާއިލް އަލީ އެވެ. އަޒްޔާން ނުބައިވީ، ހަތް ބޯޅައިން ފަސް ލަނޑު ހަދާފައިވަނިކޮށެވެ.
ކޮލިފައިންގައި ރާއްޖެ ދެން ކުޅޭ މެޗުގައި، ހޯމަ ދުވަހު ކުޅޭނީ ކުވެއިތުއާ އެވެ.
