ރާއްޖޭގައި ބޮޑެތި އަދަދުން އިންވެސްޓްކުރާ އިންވެސްޓަރުންނަށް މި ގައުމުން ބޯހިޔާވަހިކަން ހަމަޖައްސައިދޭ ޕްރޮގްރާމެއް "އިންވެސްޓަރ ރެސިޑެންސީ ޕްރޮގްރާމެއް ތައާރަފްކުރަން" ވަޒީރުންގެ މަޖިލީހުން ނިންމިކަން ސަރުކާރުން މިއަދު ވަނީ އިއުލާންކޮށްފައެވެ.
އެ ނިންމުން ސަރުކާރުން ހާމަކުރުމުން މިދިޔަ ސަރުކާރުގެ އިކޮނޮމިކް މިނިސްޓަރުކަންވެސް ކުރައްވާފައިވާ އަދި އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވީ ރައީސް މުއިއްޒު އައު މަސައްކަތެއްގެ ގޮތުގައި "އިންވެސްޓަރ ރެސިޑެންސީ ޕްރޮގްރާމެއް ތައާރަފްކުރަން" ވިދާޅުވި ނަމަވެސް އެ މަސައްކަތަކީ އެމްޑީޕީ ސަރުކާރުން 2020 ގައި އިމިގްރޭޝަން ގާނޫނު އިސްލާހުކޮށް " ކޯޕަރޭޓް ރެސިޑެންސީ ވިސާ" ގެ ނަމުގައި މުޅިން ނިންމާފަ އޮތް މަސައްކަތެއްކަމަށެވެ. އަދި ގާނުނެއް ނެތްތަނަމަވެެސް ރައީސް ޔާމީނުގެ ސަރުކާރުންވެސް މިފަދަ ހިދުމަތެއް ފޯރުކޮށްދީފައިވާކަން ފައްޔާޒު ފާހަގަކުރެއްވިއެވެ.
ފައްޔާޒު ވިދާޅުވީ މި މަސައްކަތް މިދިޔަ ސަރުކާރުން ކުރަން ފެށުމުން ގައުމު ވިއްކާލަނީކަމަށް ބުނެ އޭރު އިދިކޮޅުގައި އޮތް ޕީއެންސީ ގައުމު ވިއްކާލަނީކަމަށް ބުނެ އަޑު ފަތުރާފައިވާކަމަށެވެ. އަދި އޭރުގެ ނިންމުން ބަދަލުކޮށް މިކަން ކުރިޔަށް ގެންދިޔުމުން ފައްޔާޒު ވަނީ ރައީސް މުއިއްޒަށް މަރުހަބާ ވިދާޅުވެފައެވެ.
އިންވެސްޓާ ރެޒިޑެންސީ ޕްރޮގުރާމުތަކަކީ ދުނިޔޭގެ ތަރައްގީވެފައިވާ ގިނަ ގައުމުތަކެއްގައި ހިންގަމުންދާ ޕްރޮގުރާމުތަކެކެވެ. އެގޮތުން ޔޫރަޕުގެ ގިނަ ގަައުމުތަކާއި އޭޝިޔާގެ ތަރައްގީވެފައިވާ ގައުމުތަކުގައި މި ޕްރޮގުރާމު އަންނަނީ ތަންފީޒުކުރަމުންނެވެ. އޭގެ ތެރޭގައި މޮލްޓާއާއި މޮނާކޯއާއި ހޮންކޮންގު ފަދަ ކުދި ގައުމުތައްވެސް ހިމެނެ އެވެ.
