އިމިގްރޭޝަނުން ބުނީ މި މީހުން އަތުލައިގަތީ އެ އިދާރާގެ "އިމިގްރޭޝަން ވޮޗް" އަށް ލިބުނު މައުލޫމާތާކާއި ގުޅިގެން ގޮސް ބަލާ ފާސްކުރުމަށްފަހުކަމަށެވެ. މި ތަނުން 2 މީހަކު ހައްޔަރުކޮށްފައިވާކަމަށް އިމިގްރޭޝަނުން ބުނެއެވެ.
މި މީހުންނަކީ ދިވެހިން އާންމުކޮށް ދުފުމުގައި ބޭނުންކުރާ ތަކެތި، ވިޔަފާރިއަށް ތައްޔާރުކުރަމުންދާ ބައެއް ކަމަށް އިމިގްރޭޝަނުން ބުނެއެވެ.
އިމިގްރޭޝަނުން އާއްމުކޮށްފައިވާ ފޮޓޯތަކުން ފެންނަ ގޮތުގައި މި މީހުން މި މަސައްކަތް ކުރަމުންދިޔައީ ކުޑަކުޑަ ތަންކޮޅެއްގަ ތެރޭގައެވެ. އަދި ފޯއް ކޮށާއި އެތަކެތި ޑެލިވަރީއަށް ކޮތަޅުތަކަށް އަޅަނީ ބިންމަތީގައި ބަހައްޓައިގެންނެވެ. އަދި ފޯއްކޮށުމުގެ ކުރިން އެތަކެތި ފެންނަށް އަޅާފައި ހުރި ޓައްޕަކީވެސް އެހާ މުޑުދާރުކޮށް ހުރި އެއްޗެކެވެ. އަދި ކޮށުމަށްފަހު އެތަކެތި ހިއްކަން އަތުރާފައިވަނީ އެނދެއް ކަހަލަ ތަނެއްގައެވެ.
އިމިގްރޭޝަނުން ބުނީ އިދާރާތަކުގެ އެހީތެރިކަމާއެކު މިތަނުގައި ކުރަމުން ދިޔަ ވިޔަފާރި ހުއްޓުވުމަށް ވަނީ ނޯޓިސް ދީފަައިވާކަމަށެވެ.
އިމިގްރޭޝަނާއި ކަމާއި ގުޅޭ އިދާރާތައް ގުޅިގެން ހިންގާ އޮޕަރޭޝަންގައި މީގެކުރިންވެސް ވަނީ މުޑުދާރު ތަންތަނުގައި ކާބޯތަކެތީގެ ވިޔަފާރިކުރަމުންދިޔަ އެތައް ބިދޭސީންނެއް ހައްޔަރުކޮށްފައެވެ. އޭގެތެރޭގައި އެކި ލޭބަލްތަކުގައި ކާ ތަކެތި އުފައްދާ ދިވެހިންނަށް ވިއްކަމުން ދިޔަ މީހުން ހިމެނެއެވެ.