ހުޅުމާލޭ ދެވަނަ ފިޔަވަހީގައި މިދިޔަ ޖުލައި މަހުގެ އެންމެ ފަހު ދުވަހު ހިނގި ނުރައްކާތެރި އެކްސިޑެންޓްގައި ކާރު ދުއްވަން އިން އިބްރާހިމް އިކްރާމް ޝަރީއަތް ނިމެންދެން ބަންދުގެ މުއްދަތު ޖަހާފައިވަނިކޮށް ހައިކޯޓުން އިއްޔެ ވަނީ އޭނާ މިނިވަންކޮށް ފައެވެ.
ހައިކޯޓުން އޭނާ މިނިވަންކުރީ ބަންދުގެ މަރުހަލާގައި ގާނޫނީ ވަކީލެއްގެ އެހިހީ ހޯދުމުގެ ފުރުސަތު ދީފައިނުވާތީ ބަންދު ކުރުމުގައި އަމަލު ކުރަން ޖެހޭ އިޖުރާތުއަތަށް ފުރިހަމަކޮށްފައި ނުވާކަމަށް ކަނޑައެޅުމަށްފަހު އެވެ.
ހައިކޯޓުން ވަނީ ކްރިމިނަލް ކޯޓުން ބަންދުގެ މުއްދަތު ކުރިއަށް ގެންގޮސްފައި ވަނީ ހައްގުތައް ނުދީ ކަމަށެވެ. އެހެން ކަމުން އެ ނިންމުން ވަނީ ބާތިލުކޮށްފަ އެވެ.
ހުކުމުގައި ވަނީ ބަންދު މުއްދަތު މަޖިލީހުގައި އިކްރާމްގެ ވަކީލަކު ހުރިތޯ ބެލުމަށް ދަށު ކޯޓުގެ ފަނޑިޔާރު ފުލުހުންނާ ސުވާލުކުރި ކަމަށް ފުލުހުން ބުނެފައިވާ ކަމަށެވެ. ނަމަވެސް ކްރިމިނަލް ކޯޓުގެ ބަންދު މުއްދަތު މަޖިލީހުގެ ރެކޯޑިންތައް ހައި ކޯޓަށް ގެންގޮސް އަޑުއެހިއިރު، އެފަދަ ވާހަކައެއް ދަށު ކޯޓުގެ ފަނޑިޔާރު ދައްކާފައި ނުވާ ކަމަށާއި އެހެންކަމުން ހައި ކޯޓަށް ފުލުހުން ދޮގު މައުލޫމާތު ދީފައިވާތީ އެއީ ކަމާބެހޭ އިދާރާތަކުން ބަލަންޖެހޭ ކަމެއް ކަމަށް އެ ހުކުމުގައިވެ އެވެ.
ޝަރީއަތް ނިމެންދެން އިކްރާމު ބަންދުގައި ބަހައްޓަން ކްރިމިނަލް ކޯޓުން ކުރި އަމުރު ބާތިލު ކުރަން ނިންމާފައި ވަނީ ހައި ކޯޓުގައި އެ މައްސަލަ ބެލި ފަނޑިޔާރުންގެ އިއްތިފާގުންނެވެ. އެ މައްސަލަ ހައި ކޯޓުން ބެއްލެވީ ފަނޑިޔާރު މުހައްމަދު ފައިސަލާއި ފަނޑިޔާރު ހަސަން ޝަފީއުގެ އިތުރުން ފަނޑިޔާރުން އަބްދުލްމާނިއު ހުސައިނެވެ. ބެންޗުގެ ރިޔާސަތަކީ ފަނޑިޔާރު ފައިސަލެވެ.
ޖުލައި މަހު ހިނގި ނުރައްކާތެރި އެ އެކްސިޑެންޓުގައި އަނިޔާވި މީހާއަށް ސީރިއަސް އަނިޔާތަކެއްވި އެވެ، އޭނާއަށް ފަރުވާ ދިނީ އައިޖީއެމް ހޮސްޕިޓަލުގަ އެވެ.
އިކްރާމު ބަންދުން ދޫވީ ފުލުހުންގެ އިހުމާލުން ތޯ ބަލައި ފިޔަވަޅު އަޅާނެ ކަމަށާއި ކޯޓު އަމުރެއްގެ ދަށުން އޭނާ ހައްޔަރު ކުރަން މަސައްކަތް ކުރާ ކަމަށް ހޯމް މިނސްޓަރު އަލީ އިހުސާން އެކްސްގައި ވިދާޅުވި އެވެ.
އޭގެ ހަތަރު ގަޑިއިރު ފަހުން އިކުރާމް ހައްޔަރުކުރި ކަމަށް މިނިސްޓަރު ވިދާޅުވި އެވެ. އެ އެކްސިޑެންޓާ ގުޅިގެން ހައްޔަރު ކުރީ ހ. ނޫރަންމާގެއާގެ އިކްރާމްއަބްދުއްރަހުމާން، މ. ލޭންޑްއޮފްގާރޑްން އިބްރާހިމް އިކްރާމް އަދި ކަނޑުހުޅުދޫ، އާޒާދުގެ ޖިނާހް އިސްމާއިލްއެވެ. މީގެ ތެރެއިން ޝަރީއަތް ނިމެންދެން ބަންދުކޮށްފައި ތިބީ އިކްރާމުއްރަހްމާން އަދި އިބްރާހީމް އިކްރާމް އެވެ.
