މި ވީޑިއޯ އިންޓަނެޓުގައި ވަރަށް ބޮޑަށް ފެތުރިފައިވެއެވެ. އައިޝްވަރިޔާ އާއި އަބިޝެކްގެ ކައިވެނި ފަހަކަށް އައިސް ޚަބަރުތަކުގައި ވަރަށް ގިނައިން ފެންނަމުންދެއެވެ. އެ ދެމަފިރިން ވަރިވާ ކަމަށް ބުނެ ގިނަ ލިޔުންތަކެއް ނެރެފައިވެއެވެ.
އައިޝްވަރިޔާ އާއި ޖަޔާ ބަޗަންއާ ދެމެދު އޮންނަ ގުޅުމާއި އާއިލާގެ އެހެން މެންބަރުންނާ އޮންނަ ގުޅުމުގެ ސަބަބުން މައްސަލަތަކެއް ދިމާވެފައިވާ ކަމަށް ބުނެފައިވެއެވެ. އަދި އެ ދެމަފިރިން ވަކިން ދިރިއުޅެމުންދާ ކަމަށްވެސް ބުނެފައިވެއެވެ.
ދާދިފަހުން އަބިޝެކް ބަޗަން ދިން އިންޓަވިއުއެއްގައި އޭނާގެ ކައިވެނީގެ އަނގޮޓި ދައްކާލުމަށްފަހު ބުނެފައިވަނީ އެ ދެމަފިރިން އަދިވެސް ކައިވެނިކޮށްގެން ތިބި ކަމަށެވެ. އަދި ވަރިވާ ކަމުގެ އަޑުތަކަކީ ދޮގު ވާހަކަތަކެއް ކަމަށެވެ. ނަމަވެސް އޭގެ ފަހުން ވެސް ވަރިވާ ކަމުގެ އަޑުތައް ހުއްޓިފައެއް ނުވެއެވެ.
މިހާރު އައު ވީޑިއޯއެއް މި ދަނީ ފެތުރެމުންވެ. އެއީ އައިޝްވަރިޔާ އާއި އަބިޝެކް އާރާދިޔާއާ އެކު ދުބާއީ އެއަރޕޯޓުން ފެނުނު ވީޑިއޯއެކެވެ. އެ ވީޑިއޯގައި އެ ތިން މީހުން އެއަރޕޯޓް ބަހަކަށް އަރަނިކޮށް ފެނެއެވެ. ފުރަތަމަ އަރަނީ އަބިޝެކެވެ. ދެން އައިޝްވަރިޔާ އާއި އާރާދިޔާއެވެ. މި ވީޑިއޯ ފެނުމުން ބައެއް މީހުން ބުނެފައިވަނީ އެ ދެމަފިރިން އަނެއްކާ ވެސް އެކުގައި އުޅެން ފަށައިފި ކަމަށާއި އެ ދެމީހުންގެ ދެމެދުގައި މައްސަލައެއް ނެތް ކަމަށެވެ.
ފިލްމީ މަސައްކަތުގެ ދާއިރާއިން ބަލާއިރު، އަބިޝެކް "ކިންގް" ފިލްމުގައި މައިގަނޑު ވިލަން ރޯލުން ފެނިގެންދާނެއެވެ. މި ފިލްމުގެ މައި ލީޑް ރޯލުން ފެންނާނީ ޝާރުކް ޚާނެވެ. އަދި ސުހާނާ ޚާން ވެސް މި ފިލްމުގައި ބައިވެރިވާނެއެވެ.
