މިއީ، 2017 ވަނަ އަހަރު ހިނގި ހާދިސާއަކާ ގުޅިގެން މެދުރާއްޖެތެރޭގެ ރަށެއްގެ ކޯޓަކުން ނިންމި މައްސަލައެކެވެ. މި މައްސަލަ ހައިކޯޓަށް ފަހު ސުޕްރީމް ކޯޓަށްވެސް ހުށަހެޅުނެވެ.
2021 ވަނަ އަހަރު މި މައްސަލައިގައި، ސުޕްރީމް ކުރި ހުކުމުގައިވަނީ އިސްލާމީ ޝަރީއަތުގައި ޒިނޭގެ ކުށް ސާބިތު ކުރެވެނީ ހަތަރު ފިރިހެނުންގެ ހެކިބަހުން ނުވަތަ އަމިއްލަ އިއުތިރާފުން ކަމަށެވެ. އަދި އިސްލާމީ ޝަރީއަތުގައި ހައްދުގެ ކުށްތައް ސާބިތު ކުރެވޭނީ އެއްވެސް ޝައްކެއް ނެތް މިންވަރަށް ސާބިތުވެގެން ކަމަށް ވާއިރު، ގަރީނާއެއް ބޭނުން ކޮށްގެން އެ މިންވަރަށް ކުށް ސާބިތު ނުކުރެވޭނެ ކަމަށް އިލްމުވެރިން ވިދާޅުވާތީ ޑީއެންއޭ އާއި ފޮރެންސިކް ހެކިތަކަށް އެކަނި ބިނާކޮށް ހައްދުގެ ކުށްތައް ސާބިތު ނުކުރެވޭނެ ކަމަށެވެ.
އެ މައްސަލައިގެ ހުކުމުގައިވަނީ ގަރީނާތައް ބޭނުން ކޮށްގެން ހައްދު ގާއިމް ކުރެވޭނެ މިންވަރަށް ކުށް ސާބިތު ނުކުރެވުނަސް، އެފަދަ ހެކިތަކަށް ބިނާކޮށް ތައުޒީރީ އަދަބެއް ދެވިދާނެ ކަމަށެވެ. އެގޮތުން، ބަލިވެ އިންނަ ހާލަތުގައި އެކަމުގެ މައްޗަށް ބިނާކޮށް ޒިނޭ ސާބިތު ކުރުމާއި ވަސް ދުވާ ހާލަތުގައި ރާބުއިމުގެ ކުށް ސާބިތު ކުރެވޭނެ ކަމަށް އުމަރުގެފާނުގެ ޒަމާނުގައި އަމަލު ކުރެއްވި ގޮތްތަކުން އެނގޭ ކަމަށް އެ ހުކުމުގައިވެ އެވެ. އެގޮތުން ރާބޮއެގެން ހޮޑުލި މީހެއްގެ މައްޗަށް ހައްދު ގާއިމް ކުރެއްވި ކަން އެ ހުކުމުގައި ފާހަގަ ކޮށްފައިވެ އެވެ.
ސުޕްރީމް ކޯޓުގެ ކުރީގެ ފަނޑިޔާރު، ޑރ. އަޒްމިރާލްދާ ޒާހިރު، ހުސްނުއްސުއޫދު އަދި މިހާރުވެސް ބެންޗުގައި ހިމެނޭ އައިޝާ ޝުޖޫންގެ އިއްތިފާގުން ކުރެއްވި އެ ހުކުމުގައި، އެ މައްސަލަ އަލުން ބެލުމަށް ހައިކޯޓަށްވަނީ ފޮނުވާފައެވެ. އެކަމަކު ހައިކޯޓުން މިހާތަނަށްވެސް އެ މައްސަލައިގައި އެއްވެސް ގޮތެއް ކަނޑައަޅާފައިނުވާތީ، ދައުލަތުން އެދުނީ މައްސަލަ އަނބުރާ ގެންދާށެވެ. ދައުލަތުން މައްސަލަ އަނބުރާ ގެންދަން އެދުމުން، ހައިކޯޓުންވަނީ އަންގާރަ ދުވަހު، އިސްތިއުނާފު ފޯމް ބާތިލުކޮށްފައެވެ.
